पहिरोमा ज्यान गुमाएका अनुपमको स्मृतिमा फुटबल प्रतियोेगिता सुरु, हेटौँडा ८ र १८ को विजयी सुरुवात

८ फागुन, हेटौँडा । गत १२ असोजमा मकवानपुरको इन्द्रसरोवर गाउँपालिका वडा नम्बर ३ सिस्नेरीमा पहिरोमा परी ज्यान गुमाएका हेटौँडा १२ का अनुपम घलानको स्मृतिमा फुटबल प्रतियोगिता सुरु भएको छ ।

अखिल नेपाल फुटबल संघ एन्फाद्वारा सञ्चालित सिस्नेरीस्थित वत्सलादेवी माविको प्रशिक्षण केन्द्रमा फुटबल प्रशिक्षण लिइरहेका अनुपमसहित ६ जनाको मृत्यु भएको थियो । उक्त घटनमा परी मकवानपुरगढी गाउँपालिकाका साइमन योञ्जन, इन्द्रसरोवरका दिवस बानियाँ, बारा निजगढका विकल रेग्मी, धादिङका रियान्स आचार्य र सर्लाहीका आदित्य बलम्पाकीको ज्यान गएको थियो ।

नगर खेलकुद विकास समिति हेटौँडाको आयोजनामा हेटौँडा ५ स्थित क्याम्पा रंगशालामा सुरु भएको अनुमप घलान स्मृति १६ वर्ष मुनिको नगरस्तरीय फुटबल प्रतियोगितामा हेटौँडा ८ र १८ विजयी सुरुवात गरेका छन् । बुधबारबाछ सुरु भएको प्रतियोगितामा हेटौँडा १८ ले ७ नम्बर र ८ नम्बरले १३ नम्बर वडालाई हराएका हुन् । प्रतियोगिताको उद्घाटन खेलमा १८ नम्बर वडाले ८ नम्बर वडालाई १–० गोलले हरायो । १८ का लागि अनमोल मिजारले निर्णायक गोल गरे । पहिलो हाफको छैठौं मिनेटमा गोल गर्दै वडालाई जित दिलाएका हुन् । उनी नै खेलको म्यान अफ द म्याच बने ।

यस्तै बुधबार नै भएको दोस्रो खेलमा हेटौँडा १३ लाई टाइब्रेकरमा ६–५ गोल अन्तरले हराउँदै हेटौँडा ८ विजयी भयो । निर्धारित समय एक÷एक गोलको बराबरी भएपछि टाइब्रेकरमार्फत विजेताको टुंगो लगाइएको हो । पहिलो हाफ बराबरीमा सकिएको खेलको दोस्रो हाफको आठौँ मिनेटमा शिशिर भण्डारीको गोलबाट हेटौँडा ८ ले अग्रता बनाएको थियो । त्यसको २० मिनेटपछि १३ नम्बर वडा खेलमा फर्कियो । प्रितम थिङले १३ नम्बरका लागि गोल गर्दै खेलमा फार्काए । त्यसपछि दुबैतर्फबाट गोल हुन नसकेपछि खेलको नतिजा टाइब्रेकरबाट लिइएको थियो । दोस्रो खेलको म्यान अफ द म्याच ८ नम्बरका गोलरक्षक प्रकाश परियार घोषित भए ।

प्रतियोगितामा नगरका १९ मध्ये १० वटा वडाको सहभागिता रहेको छ । नगर खेलकुद विकास समितिको आयोजना तथा हेटौंडा उपमहानगरपालिकाको आर्थिक सहयोगमा प्रतियोगिता सुरु भएको हो । नगर खेलकुद विकास समितिका अध्यक्ष रबिन्द्र घिमिरेको अध्यक्षतामा भएको कार्यक्रममा अनुपमका पिता समेत रहेका जिल्ला समन्वय समिति मकवानपुरका प्रमुख ललितबहादुर घलानको प्रमुख आतिथ्यता रहेको थियो ।

कार्यक्रममा हेटौंडा उपमहानगरपालिकाका कार्यबाहक मेयर राजेश बानियाँ, जिल्ला खेलकुद विकास समितिका अध्यक्ष राजकुमार मोक्तान, ५ नम्बर वडा अध्यक्ष सुशील घिमिरे, ६ नम्बर अध्यक्ष विष्णुबहादुर दाहाल, ८ नम्बर अध्यक्ष रामकृष्ण थापा, ९ का अध्यक्ष शुकराम केसी, ११ का अध्यक्ष जुना दाहाल, १५ का अध्यक्ष सुनिल मोक्तान, १८ का अध्यक्ष अनिल बानियाँलगायतको आतिथ्यता रहेको थियो ।

प्रतियोगिताको विजेता टिमले एक लाख तथा उपविजेता टिमले ७० हजार रुपैयाँसहित ट्रफी, मेडल र प्रमाणपत्र प्राप्त गर्नेछ । सर्वोत्कृष्ट खेलाडीले नगद १० हजार र अन्य विधागत उत्कृष्ट खेलाडीले जनही ५ हजार रुपैयाँसहित ट्रफी प्राप्त गर्नेछ ।