मकवानपुर प्रहरीद्वारा विभिन्न घटनाका ५ जना पक्राउ गरी सर्वाजनिक

१२ फागुन, हेटौँडा । मकवानपुर प्रहरीले विभिन्न घटनामा संलग्न रहेका ५ जनालाई पक्राउ गरी सोमबार सार्वजनिक गरेको छ । प्रहरीले अवैध हतियार ओसारपसारमा संलग्न २, अवैध सुन, लागूऔषध र चोरीका मोटरसाइकलबाट सामान परिवर्तन गर्ने कार्यमा संलग्न एक÷एक जना गरी ५ जनालाई पक्राउ गरेर सार्वजनिक गरेको हो ।
प्रहरीले ११ फागुनमा अवैध हतियार पेस्तोलसहित दुइजना भारतीय नागरिकलाई पक्राउ गरेको छ । पूर्वपश्चिम राजमार्ग अन्तर्गत हेटौँडा उपमहानगरपालिका वडा नम्बर १५ बाट पेस्तोल र त्यसमा लाग्ने गोलीसहित दुइजनालाई पक्राउ गरेको हो ।

जिल्ला प्रहरी कार्यालय मकवानपुरका प्रमुख (प्रहरी उपरीक्षक) विश्वराज खड्काका अनुसार पक्राउ पर्नेमा भारतको बिहार राज्य सिहुहर जिल्ला धनहरा ग्राम बस्ने २२ वर्षका धिरज कुमार र भारतको बिहार राज्य मोतीहारी जिल्ला बहरी ग्राम बस्ने २६ वर्षका दीपक कुमार रहेका छन् ।

प्रहरीले उनीहरुको साथबाट एक राउण्ड गोली लोड भएको ९ एमएमको अटोमेटिक पेस्तोल र सलाईको बट्टाभित्र लुकाएको अवस्थाको थप २ थान गोली ३ बरामद गरेको उनले जानकारी दिए । प्रहरी प्रमुख खड्काका अनुसार गौरबाट हेटौँडातर्फ आउँदै गरेको ना ८ ख ८७७३ नम्बरको बसलाई रोकी जाँच गर्ने क्रममा अवैध हतियारसहित उनीहरुलाई पक्राउ गरिएको हो । भटनाको विषयमा थप अनुसन्धान प्रक्रिया अघि बढाइएको उनले बताए ।

यस्तै मकवानपुर प्रहरीले ४३ दशमलव ३८ ग्राम सुनसहित हेटौँडाबाट एकजनालाई पक्राउ गरेको छ । पक्राउ पर्नेमा बाराको कोल्वी नगरपालिका ५ का ३३ वर्षीय जस जोशी चौधरी रहेका छन् ।
पूर्वपश्चिम राजमार्ग अन्तर्गत हेटौंडा १५ रातोमाटेमा हेटौँडातर्फ आउँदै गरेको ना ५ ख ५१२९ नम्बरको बसलाई चेकिङको क्रममा सुन फेला परेको हो ।

बस चालक चौधरीलाई शंकाको आधारमा बसबाट ओरालेर खानतलासी गर्दा ४३ दशमलव ३८ ग्राम सुन फेला परेको मकवानपुर प्रहरी प्रमुख (प्रहरी उपरीक्षक) विश्वराज खड्काले जानकारी दिए । उनका अनुसार पक्राउ गरेको सुनको बजार भाउ ६ लाख ३५ हजार २२६ रुपैयाँ रहेको छ ।

सुनसहित पक्राउ परेका जस जोशी चौधरीलाई आवश्यक अनुसन्धान एवम् कारबाहीका लागि राजश्व अनुसन्धान कार्यालय पथलैया बारा पठाइएको जिल्ला प्रहरी कार्यालय मकवानपुरका प्रवक्ता प्रहरी नायव उपरीक्षक श्यामु अर्यालले बताए ।

एकसय एम्पुल अवैध लागूऔषध डाइजेपामसहित प्रहरीले मकवानपुरको बकैया गाउँपालिका ४ छतिनका २४ वर्षीय नविन सुनारलाई हेटौंडाबाट पक्राउ गरेका छ । प्रहरीले उनको साथबाट डाईजेपाम २८ एम्पुल, फेनार्गन ५९ एम्पुल र नुर्फिन १३ एम्पुल गरी एकसय एम्पुल लागूऔषध फेला पारेको हो ।

वीरगञ्जबाट हेटौंडातर्फ आउँदै गरेको ना ७ ख ११६ नम्बरको बस चेकिङको क्रममा सुनार पक्राउ परेका हुन् । शंकाको आधारमा उनको शरीर खानतलासी गर्दा एकसय एम्पुल लागूऔषध फेला परेको जिल्ला प्रहरी कार्यालय मकवानपुरले जनाएको छ ।

यसैगरी प्रहरीले २ थान शंकास्पद मोटरसाइकलसहित बागमती गाउँपालिकाबाट एकजनालाई पक्राउ गरेको । पक्राउ पर्नेमा बाराको कलैया उपमहानगरपालिका ८ घर भई हाल मकवानपुरको बागमती गाउँपालिका ८ धमिनथानमा मोटरसाइकल ग्यारेज सञ्चालन गर्दै आएका ४२ वर्षीय समिम अन्सारी रहेका छन् ।

बागमती गाउँपालिका ७ धन्साई स्थित बाख्रेडाँडामा पूर्णबहादुर गोलेको घरमा शंकास्पद मोटरसाइकलको सामानहरु रहेको र अन्य मोटरसाइकलमा अदलीबदली गरिरहेको अवस्थामा प्रहरीले अन्सारीलाई पक्राउ गरेको हो ।

प्रहरीले बा.प्र.०२–०५४ प १४३१ नम्बर र बा ८० प ९५१ नम्बरको मोटरसाइकल समेत बरामद गरेको छ । अन्य मोटरसाइकलको विभिन्न सामान समेत बरामद गरिएको जिल्ला प्रहरी कार्यालय मकवानपुरका प्रवक्ता (प्रहरी नायव उपरीक्षक) श्यामु अर्यालले बताए ।

ईलाका प्रहरी कार्यालय फापरबारीको टोलीले अन्सारीलाई मोटरसाइकल र मोटरसाइकलको पार्ट्स सहित नियन्त्रणमा लिएको हो । फरार रहेका पूर्णबहादुर गोलेको खोजी कार्य भैरहेको प्रहरीले बताएको छ । यस विषयमा थप अनुसन्धान प्रक्रिया अघि बढाइएको जिल्ला प्रहरी कार्यालय मकवानपुरले जनाएको छ ।