सिद्धार्थ माविको ४९ औं वार्षिकोत्सवमा उत्कृष्टा शिक्षक एवं विद्यार्थी सम्मानित

१३ फागुन, हेटौँडा । हेटौँडा उपमहानगरपालिका वडा नम्बर २ मा रहेको सिद्धार्थ माध्यमिक विद्यालयले ४९ औं वार्षिकोत्सव मंगलबार सम्पन्न गरेको छ । विद्यिालयले वार्षिकोत्सवको अवसरमा उत्कृष्ट शिक्षक, उत्कृष्ट अंक ल्याउने विद्यार्थी र अभिभावकलाई सम्मान गरेको छ।

हेटौंडा उपमहानगरपालिकाकी प्रमुख मीनाकुमारी लामाको प्रमुख आतिथ्यता एवं विद्यालय व्यावस्थापन समितिका अध्यक्ष बलराम घिमिरेको अध्यक्षतामा भएको कार्यक्रम विद्यालयका ५ जना शिक्षकलाई उत्कृष्ट शिक्षकको रुपमा नगद सहित सम्मान गरिएको छ। विद्यालयका सहायक प्रधानाध्यापक सागर प्रसाद खतिवडा, अंग्रेजी माध्यम संयोजक गणेश प्रसाद हुमागाई, रोशन शाह, सुनिल शिवाकोटी, सुरुची रेग्मीलाई नगद ५ हजार र प्रशंसापत्रले सम्मान गरिएको हो।

यस्तै विद्यालयकी कर्मचारी सपनामाया गोलेलाई नगदसहित कदरपत्र र सबै भन्दी बढी उपस्थित हुने शिक्षकहरु सुप्रिया चौलागाई र शोभा तिम्सिनालाई कदर पत्रले सम्मान गरिएको छ । यसैगरी विद्यालयको भवन निर्माणका लागि योग्दान पुयाएको भन्दै मकवानपुर बहुमुखी क्याम्पसका निवर्तमान क्याम्पस प्रमुख डाक्टर शंकर उपाध्याय, २०८० सालको एसईई परीक्षा र आधारभूत तहमा ‘ए’ प्लस अङ्क प्राप्त गरेका विद्यार्थी र सतप्रतिशत नजिता प्राप्त गरेका विषयगत शिक्षकहरूलाई समेत सम्मान गरिएको छ।

उक्त अवसरमा विद्यालयका प्रधानाध्यापक परमानन्द सरोज कर्णले प्रगति प्रतिवेदन प्रस्तुत गरेका थिए । साथै कार्यक्रममा विद्यालयले त्रैमासिक रुपमा प्रकाशन गर्दै आएको सिद्धार्थ बालबाटिकाको विमोचन पनि गरिएको छ। कार्यक्रममा बोल्दै प्रमुख अतिथि लामाले हेटौंडा नगर र जिल्लाकै शैक्षिक प्रगतिका लागि सिद्धार्थ माविले खेलेको भूमिकाको प्रशंसा गरिन् ।

कार्यक्रममा राष्ट्रिय परीक्षा बोर्ड हेटौँडाका प्रमुख कृष्ण प्रसाद घिमिरे, हेटौँडा उपमहानगरपालिकाका सामाजिक विकास महाशाखा संयोजक तथा हेटौंडा १६ का वडाध्यक्ष रामकृष्ण कोइराला, हेटौँडा २ का वडाध्यक्ष विष्णु गोपाल महर्जन, विद्यालयका निवर्तमान अध्यक्ष मधु बजगाईँ, निवर्तमान प्रअ मोहन प्रसाद शर्मा लगायतले मन्तव्य व्यक्त गरेका थिए।