बागमती प्रदेशसभाको बुधबार दिउँसो १ बजेको बैठक सूचना टाँस गरेर स्थगित

२० चैत, हेटौँडा । बागमती प्रदेशसभाको बुधबारका लागि बोलाइएको प्रदेश सभा बैठक सूचना टाँस गरेर स्थगित गरिएको छ । दिउँसो १ बजेका लागि बोलाइएको बैठक बस्न नसकेपछि सूचना टाँस गरेर अर्को सूचना जारी नभएसम्मका लागि स्थगित गरिएको संसद सचिवालयले जनाएको छ ।

प्रदेशसभा सचिवालयका अनुसार प्रदेशसभाको बैठक बस्ने अवस्था नदेखिएपछि सभामुख भुवन कुमार पाठकको निर्देशन अनुसार अर्को सूचना नभएसम्मका लागि बैठक स्थगित गरिएको हो । सचिवालयका प्रवक्ता मनोज कुमार गुप्ताले प्रदेशसभा संचालनको अवस्था नरहेकाले प्रदेशसभा नियमावली २०७४ को नियम ६ को उपनियम २ बमोजिम सूचना टाँस गरेर बैठक स्थगित गरिएको जानकारी दिए ।

प्रदेशसभा संचालनका लागि मंगलबार दिनभर बसेको सर्वदलीय बैठकमा सत्तापक्ष र प्रतिपक्षदलहरु बिच सहमती जुट्न नसक्दा प्रदेशसभा बैठक प्रभावित हुँदै आएको थियो । सत्तापक्ष र विपक्षी दलहरुबिच विगतमा भएको सहमती कार्यान्वयनको विषय टुंगउन नसक्दा प्रदेशसभा बैठक दुईपटक समय तोकीएर बस्न सकेन ।

विशेषगरी बजेट माथिको विवादका कारण सत्तापक्ष र प्रतिपक्ष दल बिच विवाद हुँदै आएको थियो । मंगलबारको दिउँसो १ बजेका लागि बोलाइएको बैठकमा पनि उक्त विषयमा सहमती जुट्न नसकेपछि अपरान्ह ४ बजेसम्मका लागि बंगक सारिएको थियो । अपरान्ह ४ बजेका लागि बोलाइएको बृैठकमा पनि चल्न नसकेपछि सूचना टाँस गरेर बुधबार दिउँसो १ बजेसम्मका लागि स्थगित गरिएको थियो ।

तर बागमती प्रदेश सरकारले बुधबार बिहान मन्त्रिपरिषदको बैठकबाट चालु हिउँदे अधिवेशन अन्त्य गर्न सिफारिस गरेसँर्गै आज बुधबार दिउँसोको प्रदेश सभा बैठक अन्यौल बनेको थियो । यस्तै प्रदेश सरकारको सिफारिसमा प्रदेश प्रमुख दीपक प्रसाद देवकोटाले चालु हिउँदे अधिवेशन आज राति ११ः५९ मिनेटबाट लागू हुनेगरी अन्त्य गरिसकेका छन् ।