राष्ट्रिय महिला गोल्डकपः चितवन सेमिफाइनलमा

१९ वैशाख, हेटौँडा । शुक्रबारबाट हेटौँडामा सुरु भएको राष्ट्रिय महिला गोल्डकप फुटबल प्रतियोेगितामा चितवनले विजय सुरुवात गरेको छ । आयोजक मकवानपुरलाई टाइब्रेकरमा ५–४ गोल अन्तरले हराउँदै चितवनले विजयी सुरुवात गरेको हो । जितसँगै चितवन सेमिफाइनलमा पुगेको छ ।

मकवानपुर जिल्ला फुटबल संघको आयोजनामा हेटौँडा ६ स्थित गौरीटार रंगशालको फुटबल मैदानमा सुरु भएको प्रतियोगिताको पहिलो खेलको निर्धारित समय एक÷एक गोलको बराबरी भएपछि निर्णय टाइब्रेकरमार्फत लिइएको हो । पहिलो हाफ गोलरहित बराबरी भएकोमा चितवनले दोस्रो हाफको केहीबेरमै अग्रता बनाएको थियो । चितवनका लागि अनिता गुरुङले हेडमार्फत गोल गरेकी हुन् ।

मकवानपुरका डिफेण्डरले चितवनका खेलाडीलाई लडाएपछि पाएको फ्रिकिक बललाई उनले हेड गर्दै पोष्टको दिशा दिएकी हुन् । गोल खाए लगत्तै मकवानपुर १० खेलाडीमा सिमित बनेको थियो । मकवानपुरका खुसाना राईले चितवनकी गोलरक्षक सुजता तामाङलाई फाउल गरेपछि रेफ्रीले राईलाई रातोकार्ड दिएका थिए ।

१० खेलाडीमा सिमित भएको मकवानपुरले खेलको अन्तिम मिनेटमा सजिना स्याङ्तानको गोल मार्फत खेललाई एक÷एकको बराबरीमा फर्काउन सफल भएको थियो । त्यसपछि अतिरिक्त समयमा पनि दुबैतर्फबाट गोल हुन नसकेपछि खेल टाइब्रेकरमा पुगेको थियो । शुक्रबारको खेलको म्यान अफ द म्याच चितवनका अनिता गुरुङ घोषित भइन् । उनले नगद १० हजारसहित ट्रफी प्राप्त गरेकी छन् । जारी प्रतियोगितामा शनिबार बाराको नवजनजागृति क्लव सिमरा र संकटा क्लवको खेल हुनेछ ।

यसअघि मकवानपुर जिल्ला फुटबल संघको आयोजनामा सुरु भएको सहिद स्मृति स्थानीय तह राष्ट्रिय महिला गोल्डकप फुटबल प्रतियोेगिताको हेटौँडाकी प्रमुखर मीनाकुमारी लामाले उद्घाटन गरेकी हुन् । प्रतियोगिताको उद्घाटन गर्दै लामाले खेलकुदसहित उपमहानगरपालिकाको सर्वाङ्गीण विकासमा लागिपरेको बताइन् ।

‘नगर खेलकुद विकास समितिमार्फत हामीले सकेसम्म सबै खेललाई समेटेर विभिन्न प्रतियोगिता गरिरहेका छौं । विभिन्न संघले आयोजना गर्ने प्रतियोगितालाई पनि बजेटको व्यवस्था गरिरहेका छौं’, उनले भनिन्, ‘यस्ता प्रतियोगिताले खेल क्षेत्रको विकासमा मद्दत पुग्नेछ भन्ने हाम्रो विश्वास रहेको छ ।’

छैठौं संस्करणसम्म पुरुष गोल्डकप प्रतियोगिताको आयोजना गरेको फुटबल संघ मकवानपुरले यस वर्ष महिला गोल्डकप गरेको हो । प्रतियोगितामा २ विभागीय टोली, एउटा ए डिभिजन टोली र ५ वटा जिल्ला गरी ८ टिमको सहभागिता रहेको छ । प्रतियोगितामा विभागीय टोली नेपाल पुलिस र सशस्त्र प्रहरीको एपीएफ सहित संकटा क्लव तथा मकवानपुर, चितवन, सर्लाही, रौतहट र बारा जिल्लाको सहभागिता रहेको छ ।

प्रतियोगिताको विजेताले ५ लाख र उपविजेताले ३ लाख नगदसहित ट्रफी र प्रमाणपत्र पाउनेछन् भने सर्वोत्कृष्ट खेलाडीले स्कुटर प्राप्त गर्नेछन् । यस्तै विधागत उत्कृष्टलाई समेत नगदसहित ट्रफीको व्यवस्था गरिएको छ । हरेक खेलको म्यान अफ द म्याचले नगद १० हजार रुपैयाँ प्राप्त गर्नेछन् ।