कांग्रेस संसदीय दलको नेता चयनको लागि हरिशरण श्रेष्ठको संयोजकत्वमा निर्वाचन समिति गठन

१३ साउन, हेटौंडा । कांग्रेस बागती प्रदेश संसदीय दलको नेता चयनको लागि प्रक्रिया सुरु भएको छ । जसका लागि कांग्रेस बागमती प्रदेश कार्य सम्पादन समितिको मंगलबार बसेको बैठकले प्रदेशका सहमहामन्त्री हरिशरण श्रेष्ठको संयोजकत्वमा निर्वाचन समिति गठन गरेको छ ।

प्रदेश सभापति इन्द्रबहादुर बानियाँको सभापतित्वमा हेटौंडामा बसेको कार्यसम्पादन समितिको बैठकले सहमहामन्त्रीद्वय ऋषिराम घिमिरे र जीवन डंगोललाई रहेका सदस्यमा चयन गरेको छ ।

समितिको आजै बस्ने बैठकले निर्वाचन कार्यतालिका निर्धारण गर्नेछ । संसदीय दलको नेताको निर्वाचन भोलि बुधबार गर्ने बुझिएको छ ।

यसअघि प्रदेशका मुख्यमन्त्री समेत रहेका बहादुर सिंह लामा तामाङले संसदीय दलको नेताको हैसियत गुमाएपछि नयाँ नेता चयनको लागि प्रक्रिया सुरु भएको हो ।

मुख्यमन्त्री समेत रहेका संसदीय दलका नेता लामाविरुद्ध परेको अविश्वासको प्रस्तावको बिषयमा मंगलबार दिउँसो भएको मत विभाजनका क्रममा नेता लामा पराजित भएका थिए । प्रदेश सभामा ३५ जना सदस्य रहेको कांग्रेसका २१ जना सांसदले अविश्वासको पक्षमा र १५ जना पक्षले लामाको पक्षमा मदतान गरेका थिए ।

यो सँगै कांग्रेस बागमती प्रदेशमा संसदीय दलको नेता पद रिक्त भएको छ । कांग्रेस बागमती प्रदेश सभा संसदीय दलको नेता पद रिक्त भएसँगै नयाँ नेता चयन गर्न प्रक्रिया अघि बढाइने भएको छ ।

कांग्रेस बागमती प्रदेश कार्यसमितिको सभापति इन्द्रबहादुर बानियाँ छन् । उनकै अगुवाईमा मुख्यमन्त्री समेत रहेका बहादुरसिंह लामाविरुद्ध कांग्रेस संसदीय दलमा अविश्वास प्रस्ताव दर्ता भएको थियो । बानियाँ नै संसदीय दलको नेता बन्ने होडमा छन् ।