१
१ असोज, हेटौँडा । बागमती प्रदेश सभामा सभामुख पद रिक्त भएको छ । सभामुख भुवनकुमार पाठकले औपचारिक रूपमा पदबाट राजीनामा दिएपछि सभामुख पद रिक्त भएको हो । २४ भदौमा जेन–जी पुस्ताको आन्दोलन चरमउत्कर्षमा पुगेको वेला उनले सामाजिक सञ्जाल मार्फत राजीनामाको घोषणा गरेका थिए ।
सञ्जाल फेसबुकमार्फत राजीनामा घोषणा गरेका पाठकले बुधबार भने उपसभामुख अप्सरा चापागाईँलाई ह्वाट्सएपमार्फत राजीनामापत्र पठाएका हुन् । उनले नेपालको संविधान र प्रदेश सभा नियमावली, २०७४ बमोजिम उपसभामुखसमक्ष राजीनामा बुझाएको बताएका छन् ।
तत्कालीन समयमा प्राविधिक कारणले कानुनी प्रक्रिया पूरा गर्न असहज भएकाले औपचारिक पत्र पठाउन नसकेको स्पष्टीकरण दिँदै पाठकले बुधबार ह्वाट्सएपमार्फत राजीनामापत्र पठाएको बताएका हुन् । राजीनामा–पत्रमा पाठकले भ्रष्टाचारविरोधी आन्दोलनका क्रममा भएको अस्वाभाविक बल प्रयोग र त्यसबाट भएको मानवीय क्षतिले आफूलाई अत्यन्त भावविह्वल बनाएको उल्लेख गरेका छन् ।
उनले राष्ट्र शोकमा डुबिरहेको वेला जनताको चाहना र युवा पुस्ताको भावनाविपरीत सभामुख पदमा बसिरहनु उचित नलागेको कारण आफूले राजीनामा दिएको दिएको दावी गरेका छन् । २८ पुस ०७९ मा एमाले, माओवादी केन्द्र, राप्रपा र एकीकृत समाजवादीको समर्थनमा ६४ मत प्राप्त गरी सभामुख निर्वाचित भएका पाठक राप्रपाको समानुपातिक कोटाबाट प्रदेश सभा सदस्य बनेका थिए ।
यस्तै प्रदेश सभामा पाठकले प्रतिनिधित्व गरेको पार्टी राप्रपाले आफ्नो पार्टीका तर्फबाट प्रदेश सभामा प्रतिनिधित्व गर्ने सम्पूण सदस्यहरुलाई फिर्ता बोलाउने निर्णय गरेको थियो । तर उनीहरुले अहिलेसम्म पदबाट राजीनामा गरेको पत्र प्रदेश सभामा बुझाएका छैनन् । राप्रपाका प्रदेश संसदीय दलका नेता उद्धव थापाले आफुहरु सल्लाहमै रहेको र एकदुई दिनभित्रै राजीनामा पत्र बुझाउने बताएका छन् ।
हाम्रो नेपाली पार्टीका सांसद शैलेन्द्र मान बज्राचार्यको राजीनामा
यसैबिच ११० सदस्यीय बागमती प्रदेश सभा दुई सदस्य रहेको ‘हाम्रो नेपाली पार्टी’ का बागमती प्रदेश सभा सदस्य तथा संसदीय दलका नेता शैलेन्द्र मान बज्राचार्यले सांसद पदबाट राजीनामा दिएका छन् । उनले जेनजी आन्दोलनलाई सामाजिक सञ्जालमार्फत समर्थन गर्दै पद त्यागेको घोषणा गरेका थिए । बज्राचार्यले फेसबुकमार्फत जेनजी आन्दोलनका सहिदहरूप्रति भावपूर्ण श्रद्धाञ्जली व्यक्त गर्दै प्रदेश सदस्यबाट राजीनामाको घोषणा गरेका छन् ।
Hetauda Live ले समाचार, विचार, मनोरन्जन, खेल, विश्व, सुचना प्रविधि, भिडियो तथा जीवनका बिभिन्न आयामका समाचार र विश्लेषणलाई समेट्छ । मर्यादित समाज विकास र उन्नतीको पथमा अगाडी बढ्ने उदेश्यका साथ आवाज बिहीनहरुको आवाज बनेर बाहिर प्रस्फुटन हुन नसकेको सत्य तथ्य, निष्पक्ष समाचार संप्रेसण गर्न सधै प्रतिबद्धछौ । भ्रस्टाचार, अनियमितता सम्बन्धी कुनै अडियो भिडियो तपाई संग छ भने हामीलाई उपलब्ध गराउनुहोस र जिम्मेवार नागरिकको दायित्व पुरा गर्नुहोला, श्रोत गोप्य राखिने छ ।
