ब्रेकफेल भएको बसले मोटरसाइकललाई ठक्कर दिदा दुईको मृत्यु

१५ असोज, हेटौंडा । मकवानपुर र बाराको सिमानास्थित जीतपुरसिमरा उपमहानगरपालिका वडा नम्बर २२ चुरियामाई मन्दिर नजिक ब्रेकफेल भएको यात्रुबाहक बसले मोटरसाइकललाई ठक्कर दिदा दुईको मृत्यु भएको छ । ६ जना घाइते भएका छन् ।

जिल्ला ट्राफिक कार्यालय बाराका प्रमुख प्रहरी निरीक्षक दिपक केसीका अनुसार जनकपुरबाट काठमाडौंतर्फ जाँदै गरेको ना ७ ख ८५३७ नम्बरको बसको ब्रेक फेल भएपछि दुर्घटना भएको हो। उकालोमा गुडिरहेको बस ब्रेक फेल भएर पछाडी सर्दा बसको पछाडी रहेका दुईवटा मोटरसाइकललाई ठक्कर दिएको थियो ।

ठक्करबाट बारा फेटा गाउँपालिका–१ भरवलियाका २५ वर्षीय मकेश्वर पटेल गम्भीर घाइते भई उपचारका क्रममा मृत्यु भएको प्रहरीले जनाएको छ। उनकी २६ वर्षीया श्रीमती कविता देवी र करिब २० महिनाकी छोरी तानेया पटेल घाइते छन्।

त्यस्तै, वीरगञ्ज महानगरपालिका–३१ का २७ वर्षीय कञ्चन कुमार पटेलकी श्रीमती २२ वर्षीया कलिता देवी पनि उपचारका क्रममा मृत्यु भएको हो। कञ्चन कुमार र उनका ३ वर्षीय छोरा आयुष पटेल भने घाइते भएर उपचाररत छन्।

दुर्घटनापछि बस चालक सर्लाही, लालबन्दी नगरपालिका–३ का ४७ वर्षीय विश्वनाथ चौधरीलाई प्रहरीले नियन्त्रणमा लिएको छ। सोही क्रममा पछाडि रहेको एक इभि माइक्रो गाडीमा पनि सामान्य क्षति पुगेको प्रहरीले जनाएको छ।