विपद् व्यवस्थापनमा बागमती सरकार सक्रियः ५ करोड ४० लाख रुपैयाँ बजेट निकासा

२१ असोज, हेटौँडा । मनसुनजन्य विपद्को पूर्वतयारी र प्रतिकार्यलाई प्रभावकारी बनाउन बागमती प्रदेश सरकारले ५ करोड ४० लाख रुपैयाँ बजेट निकासा गरेको छ । गत १८ र १९ असोजमा परेको अविरल वर्षाबाट उत्पन्न विपद्को व्यवस्थापनलाई लक्षित गर्दै प्रदेश सरकारले उक्त बजेट स्थानीय तहहरूमा उपलब्ध गराएको हो ।

प्रदेशको आन्तरिक मामिला तथा कानुन मन्त्रालयका अनुसार, विपद् जोखिम न्यूनीकरण तथा व्यवस्थापनका लागि विभिन्न मन्त्रालय र सुरक्षा निकायहरू सम्मिलित ‘युनिफाइड टिम’ गठन गरी प्रतिकार्यलाई सशक्त बनाइएको छ । मुख्यमन्त्री इन्द्रबहाुर बानियाँको अध्यक्षतामा बसेको टिमको बैठकले खोज, उद्धार र राहतका लागि तत्काल कदम चाल्न निर्देशन दिएको थियो ।

मन्त्रालयका विपद् व्यवस्थापन महाशाखा प्रमुख सुरेश खनालका अनुसार, प्रदेश विपद् व्यवस्थापन परिषद्को निर्णयअनुसार २१ वटा स्थानीय तहलाई २ करोड १० लाख र १६ वटा स्थानीय तहलाई २ करोड ६५ लाख रुपैयाँ पूर्वतयारी तथा जोखिमयुक्त क्षेत्र संरक्षणका लागि निकासा गरिएको हो । साथै, प्रत्येक जिल्ला विपद् व्यवस्थापन समितिलाई ५ लाखका दरले ६५ लाख रुपैयाँ उपलब्ध गराइएको छ । खनालका अनुसार, मनसुनपूर्व तयारी अन्तर्गत प्रदेशका १६ पालिकामा विपद् उद्धार सामग्रीसहितका गोदामघरहरू समेत निर्माण गरिएको छ ।

१८ असोजको वर्षाबाट बागमतीमा ३५ विपद्का घटना, एकको मृत्यु
मन्त्रालयको विवरणअनुसार असोज १८ गतेको वर्षाबाट प्रदेशभर ३५ वटा विपद्का घटना भएका छन् । ती घटनाबाट १६२ परिवार प्रभावित भएका छन् भने काभ्रेपलाञ्चोकमा पहिरोमा परी एक जनाको मृत्यु भएको छ । यस्तै रसुवामा बाढीका कारण ४ जना बेपत्ता भएका छन् । ललितपुरमा पहिरोमा परी २ जना र मकवानपुरमा चट्याङ लागेर १ जना घाइते भएका छन् । यी घटनाबाट करिब ४ लाख ५० हजार रुपैयाँ बराबरको आर्थिक क्षति भएको अनुमान गरिएको छ ।

मनसुनी वर्षाबाट अवरुद्ध भएका प्रदेश राजधानी हेटौँडाबाट सिस्नेरी, फाखेल, हुमाने लगायतका प्रादेशिक सडकहरू २४ घण्टाभित्रै सञ्चालनमा ल्याइएको मन्त्रालयले जनाएको छ । यस्तै काभ्रेका बेथानचोक, खानिखोला, महाभारत र रोशी गाउँपालिकाका सडकहरू सुचारु गर्न स्थानीय तह र निर्माण व्यवसायीबीच समन्वय भइरहेको महाशाखा प्रमुख खनालले जानकारी दिए । यसैगरी ललितपुरमा एकतर्फी सडक खुलाउने प्रयास जारी छ भने रामेछापमा सडक सञ्चालनमा आइसकेको छ । मुग्लिन–नारायणघाट सडकखण्ड अवरुद्ध हुँदा, नौविसे–हेटौंडा र फर्पिङ–हेटौंडा सडकलाई वैकल्पिक मार्गको रूपमा प्रयोग गरिएको छ ।

अविरल वर्षाका कारण अवरुद्ध सडकमा फसेका १०३ जना आपतकालीन यात्रु र पर्यटकहरूलाई उद्धार गरिएको बागमती प्रदेश यातायात निर्देशनालयले जनाएको छ । निर्देशनालयका निर्देशक इन्जिनियर नविन सिंहका अनुसार, असोज १८ गते राति १० बजे महालक्ष्मी खोलामा खसेको पहिरो पन्छाई १५ वटा सवारीसाधनलाई सुरक्षित रूपमा काठमाडौँ पठाइएको थियो ।

यस्तै भैँसे–भीमफेदी–कुलेखानी सडकखण्डमा अवरोध हटाएर आकस्मिक उडानमा जानुपर्ने यात्रुहरूलाई समयमै गन्तव्यमा पु¥याउने व्यवस्था गरिएको उनले बताए । असोज १९ गते बिहान मौसम सुधारसँगै पूर्वाधार विकास कार्यालय मकवानपुरले भैँसे–भीमफेदी–कुलेखानी–फाखेल–हुमाने सडकको क्षति मूल्यांकन, जोखिम पहिचान र पहिरो पन्छाउने कार्य सम्पन्न गरेको थियो । यस्तै सिस्नेरी–दक्षिणकाली–फर्पिङ सडक र फाखेल–देउराली–मातातीर्थ–सतुंगल सडक पूर्ण रूपमा सञ्चालनमा ल्याइएको निर्देशनालयले जनाएको छ।