सडक बिस्तारका लागि हेटौंडामा शनिबार बिहानै चल्यो डोजर

२० मङ्सिर , हेटौंडा । लामो समयदेखि रोकिदै आएको हेटौँडाको सडक बिस्तार शनिवारबाट सुरु भएको छ । शनिवार बिहानैबाट सडक डिभिजन कार्यलय हेटौँडाका डोजरले हेटौँडाका मुख्य बजार क्षेत्रका अतिक्रमित घर तथा टहरा भत्काउन थालेका छन् ।

स्थानीय प्रशासनको सहयोगमा बाक्लो सुरक्षाकर्मीको उपस्थितिकाबीच सडक डिभिजन कार्यालय हेटौँडाले राजमार्गको दुबैतर्फ २५÷२५ गज भित्र परेका अतिक्रमित स्थाई तथा अस्थाई संरचना भत्काउने काम अघि बढाएको हो ।

डिभिजन कार्यलयका झण्डै ६÷७ वटा डोजर र स्काभेटरको प्रयोग गरेर अहिले बुद्धचोकदेखी सिमाचोक क्षेत्रमा रहेको घरहरु भत्काउने काम भइरहेको डिभिजन कार्यालयले जनाएको छ । यससँगै बजारका अन्य ठाउँहरूमा पनि एकैपटक डोजर परिचालन गरी तीन–चार स्थानबाट विस्तार कार्य थालिएको छ ।

१५ दिने अल्टिमेटम सकिएपछि जबर्जस्ती हटाउन थालेको सडक डिभिजन हेटौंडाले गत मंसिर ५ गते महेन्द्र राजमार्गको रातोमाटेदेखि बुद्धचोक हुँदै राप्ती पुलसम्म तथा त्रिभुवन राजपथको बुद्धचोकदेखि सामरी पुलसम्म २५–२५ गज (७५–७५ फिट) सडक सीमा कायम गर्दै संरचना हटाउन १५ दिने अल्टिमेटमसहित सार्वजनिक सूचना जारी गरेको थियो ।

तर अन्तिम दिनसम्म पनि सडक सीमाभित्रका संरचना स्वेच्छिक रूपमा नहटेकाले डिभिजनले आफैं भत्काउने काम सुरू गरेको हो । घरधनी तथा व्यवसायीहरूले मुआब्जा र क्षतिपूर्ति माग गर्दै सडक विस्तारको विरोध गर्दै आएका छन् । सडक विस्तार प्रभावित क्षेत्रका अधिकांश व्यवसायी र घरधनीले संरचना भत्काउने कदमको प्रतिकार गर्ने चेतावनी दिँदै विरोध कार्यक्रम गर्दै आएका छन् । तर, केही सीमित परिवार भने घर खाली गरेर सामान सारिसकेका छन् ।

वर्षौँदेखि अलपत्र परेको विस्तार योजना

सडक डिभिजनले २०७६ असारमा १ नम्बर वडामा सरकारी निकायले उपयोग गरिरहेको सडक क्षेत्र खाली गराएपछि केही समय सक्रिय भए पनि पछिल्ला वर्षहरूमा मैदानमै उत्रिन सकेको थिएन । त्यतिबेला राप्ती रोडमा स्थानीय र प्रहरीबीच झडप समेत भएको थियो

दुई वर्षअघि डिभिजनले अर्को सूचना जारी गरेको थियो तर घरधनीहरू सर्वोच्च अदालत पुगेपछि प्रक्रिया रोकिएको थियो । सोही मुद्दाको अदालतको फैसलाको आधारमा अहिले विस्तार पुनः सुरु गरिएको हो । यसक्रममा रातोमाटेदेखि राप्ती पुलसम्म र बुद्धचोकदेखि सामरी पुलसम्म करिब ८.५ किलोमिटर क्षेत्रमा पर्ने कुल ५३१ वटा घर, टहरा तथा अन्य संरचना भत्काउनुपर्ने सडक डिभिजनले जनाएको छ ।

सडक केन्द्रबिन्दुबाट २५–२५ गजभित्र पर्ने संरचना मध्ये दायाँतर्फ २३४ र बायाँतर्फ २९७ संरचना हटाइने डिभिजनका प्रमुख अधिकृत इन्जिनियर गुरुप्रसाद अधिकारीले जानकारी दिए । सडक विस्तारसँगै हेटौंडाको मूल सहर क्षेत्रमा यातायात व्यवस्थापन सहज हुने अपेक्षा गरिए पनि क्षतिपूर्ति र पुनर्वासको विवाद टुङ्गिन बाँकी रहेकाले स्थानीय स्तरमा तनाव अझै कायमै रहेको छ ।