मध्य र पूर्वी नेपालमा राति वर्षा र हावाहुरीको सम्भावना

६ चैत, हेटौँडा । जल तथा मौसम विज्ञान विभागले आज शुक्रबार राति मध्य र पूर्वी नेपालका केही क्षेत्रमा वर्षा र हावाहुरीको सम्भावना रहेको जनाएको छ। विभागका वरिष्ठ मौसमविद् वरुण पौडेलका अनुसार लुम्बिनीका पूर्वी क्षेत्र, बागमती, मधेश र कोशीमा राति हावाहुरी र वर्षा हुने अनुमान गरिएको छ।

पछिल्लो एक घण्टामा बागमती, मधेशका केही क्षेत्र र कोशीमा पानी परेको छ भने पश्चिम नेपालका केही ठाउँमा हल्का वर्षा भएको छ। वरिष्ठ मौसमविद् पौडेलले भने, “दिउँसोबाट एक्टिभ भएको प्रणाली पूर्वतिर सिफ्ट भइरहेको छ। अपराह्नपछि लुम्बिनी र बागमतीमा ठुलो हावाहुरी चलेको छ। राति मधेश लगायत क्षेत्रमा हावाहुरीको सम्भावना छ।”

उनका अनुसार भोलि शनिबार कोशी क्षेत्रमा हावाहुरी चल्ने देखिएको छ। आज शुक्रबारजस्तो भोलि ठुलो क्षेत्रमा वर्षा हुने सम्भावना कम भए पनि कोशी, मधेश, बागमती र गण्डकी लगायतका क्षेत्रमा वर्षा हुने अपेक्षा गरिएको छ।

यसका साथै अन्य क्षेत्रमा पनि बादल लाग्ने र हल्का पानी पर्ने देखिएको छ। विभागले जनाएको छ कि यो प्रणाली शनिबार रातिबाट क्रमशः कमजोर हुँदै जानेछ।