खुला दौड प्रतियोगितामा सिर्जना सिंतान र मिङमर तामाङ प्रथम

१४ जेठ, हेटौँडा । गणतन्त्र दिवस २०८२ को अवसरमा आयोजित खुला दौड प्रतियोगितामा महिलातर्फ सिर्जना सिंतान र पुरुषतर्फ मिङमर सिंगी तामाङ विजयी भएका छन् ।

बुधबार हेटौँडामा प्रदेश खेलकुद विकास परिषद् बागमती प्रदेशको आयोजनामा र मकवानपुर जिल्ला खेलकुद विकास समितिको संयोजनमा सम्पन्न भएको दौड प्रतियोगिता बुद्धचोकबाट सुरु भई कान्तिलोकपथ, भैरवरोड, लक्ष्मी स्कुल, सूर्यचोक, थाहा चोक हुँदै पुनः बुद्धचोकमा समापन भएको थियो ।

पाँच किलोमिटरको दूरी रहेको उक्त प्रतिस्पर्धामा महिलातर्फ सिर्जना सिंतान पहिलो, शुष्मा दर्लामी दोस्रो र कृषिका क्षेत्री तेस्रो स्थानमा रहिन् । यस्तै, पुरुषतर्फ मिङमर सिंगी तामाङ पहिलो, राजकुमार गोले दोस्रो र विजन सुनार तेस्रो स्थानमा रहे ।

विजेता प्रतियोगीहरूले क्रमशः पहिलो, दोस्रो र तेस्रो स्थानका लागि १५ हजार, १० हजार र ५ हजार रुपैयाँ नगद पुरस्कारसहित प्रमाणपत्र प्राप्त गर्नेछन् ।

विजेताहरुलाई पुरस्कारहरू गणतन्त्र दिवस मूल समारोह समितिको आयोजनामा बिहीबार हेटौँडामा हुने विशेष कार्यक्रममा वितरण गरिने प्रदेशका मन्त्री मीनकृष्ण महर्जनले जानकारी दिए ।