सुकुमवासी तथा अव्यवस्थित बसोबासीको प्रदर्शन

२१ वैशाख, हेटौँडा । संघीय सरकारले अतिक्रमित बस्ती खाली गर्ने तयारी थालेपछि मकवानपुरमा भूमिहीन सुकुमवासी तथा अव्यवस्थित बसोबासीहरू विरोधमा उत्रिएका छन् । सोमबार हेटौँडा उपमहानगरपालिका वडा नम्बर ११ थानाभर्‍याङबाट र्‍याली निकाल्दै उनीहरू जिल्ला प्रशासन कार्यालय मकवानपुर पुगेका थिए ।

प्रदर्शनकारीले सुकुमवासी बस्ती हटाउने सरकारी कदमको विरोध गर्दै व्यवस्थापनको मागसहित प्रधानमन्त्रीलाई सम्बोधन गरिएको ज्ञापनपत्र प्रशासनमार्फत बुझाएका छन्। नाराबाजीसहित भएको प्रदर्शनमा सहभागीहरूले ‘उठीवास होइन, व्यवस्थापन गर’ भन्ने माग अघि सारेका थिए । उनीहरूले जिल्ला प्रशासन कार्यालय मकवानपुरका प्रमुख वसन्त अधिकारी र हेटौँडा उपमहानगरपालिकाकी मेयर मीनाकुमारी लामालाई ज्ञापानपत्रसमेत बुझाएका हुन् ।

सरकारले केही दिनदेखि काठमाडौं उपत्यकाका अतिक्रमित बस्ती खाली गर्न थालेपछि गृह मन्त्रालयले अन्य जिल्लामा पनि लगत संकलन गर्न निर्देशन दिएको छ । सोही निर्देशनपछि मकवानपुरका सुकुमवासीहरू पनि आफ्नो बास उठ्ने हो कि भन्ने कुरामा सशंकित बनेका हुन् ।

भूमिहीन सुकुमवासी र अव्यवस्थित बसोबासीका तर्फबाट ज्ञापनपत्र बुझ्दै प्रमुख जिल्ला अधिकारी अधिकारीले गृह मन्त्रालयको निर्देशनअनुसार सुकुमवासीहरूको लगत संकलन कार्य भइरहेको जानकारी दिए । सरकारको निर्देशन पालना गर्ने निकाय भएकाले सोहीअनुसार नै भूमिहीन तथा अव्यवस्थित बसोबासीको लगत संकलन गर्ने कार्य जिल्ला प्रशासन कार्यालयले गरिरहेको उनको भनाइ छ ।

यस्तै, उनीहरूले हेटौँडा उपमहानगरपालिकाकी मेयर मीनाकुमारी लामालाई पनि ज्ञापनपत्र बुझाएका छन् । ज्ञापनपत्र बुझ्दै मेयर लामाले हेटौँडामा अन्यत्र जस्तो भूमिहीन सुकुमवासी र अव्यवस्थित बसोबासीले रुँदै हिँड्नुपर्ने गरी काम नगर्ने स्पष्ट पारिन् । उनले सरकारले सरकारी जग्गा अतिक्रमण भएका क्षेत्रमा बसोबास गर्नेहरूको उचित व्यवस्थापन गरेर मात्रै काम गर्ने दाबी पनि गरिन् ।

प्रदर्शनकारीहरूले सुकुमवासीलाई हटाउने नीति अव्यावहारिक भएको भन्दै दीर्घकालीन समाधानका रूपमा व्यवस्थित बसोबास, जग्गा व्यवस्थापन र अधिकार सुनिश्चित गर्न सरकारसँग माग गरेका छन् ।