१
१८ जेठ, हेटौँडा । प्रधानमन्त्री बालेन्द्र शाहले प्रतिनिधिसभामा सीमा विवादका विषयमा दिएको पछिल्लो अभिव्यक्तिविरुद्ध बागमती प्रदेशसभा बैठकमा तीव्र विरोध भएको छ। प्रधानमन्त्री शाहले ‘नेपालले पनि भारतको सीमा मिचेको छ’ भन्ने अभिव्यक्ति दिएको भन्दै प्रदेशसभा सदस्यहरूले त्यसलाई राष्ट्रघाती, आपत्तिजनक र राष्ट्रिय हितविपरीत रहेको आरोप लगाएका छन्।
सोमबार बसेको बागमती प्रदेशसभा बैठकमा आगामी आर्थिक वर्ष २०८३र०८४ को नीति तथा कार्यक्रममाथिको छलफलका क्रममा अधिकांश सांसदहरूले प्रधानमन्त्रीको भनाइको आलोचना गर्दै सार्वजनिक रूपमा माफी माग्न र आवश्यक परे पदबाट राजीनामा दिनुपर्ने माग गरेका हुन्।
नेकपा एमाले बागमती प्रदेश संसदीय दलका नेता जगन्नाथ थपलियाले प्रधानमन्त्रीको अभिव्यक्तिलाई “इतिहासकै कालो धब्बा”को संज्ञा दिँदै संसद्मार्फत नेपाली जनतासँग माफी माग्नुपर्ने बताए। उनले बागमती प्रदेशसभाले प्रधानमन्त्रीको भनाइप्रति खेद प्रस्ताव पारित गर्नुपर्ने मागसमेत गरे।
“भारतीय सञ्चारमाध्यमले समेत दाबी नगरेको कुरा नेपाली प्रधानमन्त्रीले बोलेर अन्तर्राष्ट्रिय समुदायसामु नेपालीको शिर निहुराउने काम गर्नुभएको छ,” उनले भने।
पूर्वमुख्यमन्त्री तथा नेकपा (माओवादी केन्द्र) बागमती प्रदेश संसदीय दलका नेता शालिकराम जम्कट्टेलले राष्ट्रियताको विषयमा प्रधानमन्त्रीबाट गैरजिम्मेवार अभिव्यक्ति आउनु दुर्भाग्यपूर्ण भएको बताए। भारतले कालापानी, लिपुलेक र लिम्पियाधुरालगायत क्षेत्रमा अतिक्रमण गरिरहेको अवस्थामा आफ्नै देशलाई दोषी देखाउने अभिव्यक्ति आउनु राष्ट्रिय स्वार्थविपरीत भएको उनको भनाइ थियो।
उनले प्रधानमन्त्रीको अभिव्यक्ति र सत्ता साझेदार दल राष्ट्रिय स्वतन्त्र पार्टीका सभापतिको भारत भ्रमणबीच कुनै राजनीतिक सम्बन्ध वा दबाब रहेको हो कि भन्ने प्रश्नसमेत उठाए।
नेकपा एमालेका प्रमुख सचेतक रत्नप्रसाद ढकालले प्रधानमन्त्री शाहले तत्काल राजीनामा दिनुपर्ने माग गरे। उनले नेपालका विभिन्न सीमावर्ती क्षेत्रमा भारतद्वारा अतिक्रमण भइरहेका तथ्यहरू रहेको दाबी गर्दै प्रधानमन्त्रीको भनाइलाई “राष्ट्रघाती”को संज्ञा दिए।
“देशको नेतृत्वकर्ताबाट यस्तो अभिव्यक्ति आउनु स्तब्धकारी र आपत्तिजनक छ,” उनले भने।
सांसद सुस्पा भुजेलले प्रधानमन्त्रीको भनाइले नेपाली जनताको स्वाभिमानमा गम्भीर चोट पुगेको बताउँदै संसद् र देशलाई लिखित रूपमा स्पष्टीकरण दिनुपर्ने माग गरिन्। उनले प्रधानमन्त्रीले पदत्याग गर्नुपर्ने धारणा पनि राखिन्।
त्यसैगरी नेकपा बागमती प्रदेश अध्यक्ष सरल सहयात्रीले काठमाडौं महानगरपालिकाको प्रमुख हुँदा ‘ग्रेटर नेपाल’को नक्सा प्रदर्शन गर्ने बालेन शाह अहिले भारतप्रति नरम बनेको आरोप लगाए।
Hetauda Live ले समाचार, विचार, मनोरन्जन, खेल, विश्व, सुचना प्रविधि, भिडियो तथा जीवनका बिभिन्न आयामका समाचार र विश्लेषणलाई समेट्छ । मर्यादित समाज विकास र उन्नतीको पथमा अगाडी बढ्ने उदेश्यका साथ आवाज बिहीनहरुको आवाज बनेर बाहिर प्रस्फुटन हुन नसकेको सत्य तथ्य, निष्पक्ष समाचार संप्रेसण गर्न सधै प्रतिबद्धछौ । भ्रस्टाचार, अनियमितता सम्बन्धी कुनै अडियो भिडियो तपाई संग छ भने हामीलाई उपलब्ध गराउनुहोस र जिम्मेवार नागरिकको दायित्व पुरा गर्नुहोला, श्रोत गोप्य राखिने छ ।
