पहिलो सहभागितामै चित्लाङ बागमती गोल्डकपको फाइनलमा

२४ वैशाख, हेटौँडा । काठमाडौंको चित्लाङ एफसी मकवानपुरको बागमती गाउँपालिकामा जारी आठौँ संस्करणको बागमती गोल्डकप राष्ट्रिय फुटबल प्रतियोगिताको फाइनलमा प्रवेश गरेको छ।

पहिलोपटक प्रतियोगितामा सहभागिता जनाएको चित्लाङले बिहीबार भएको दोस्रो सेमिफाइनल खेलमा सिमराको नवजनजागृती क्लबलाई ५–१ गोलले पराजित गर्दै उपाधिनजिक पुगेको हो।

सहिद स्मृति रंगशालामा भएको खेलमा चित्लाङले सुरुवातदेखि नै आक्रामक खेल प्रस्तुत गरेको थियो। चित्लाङको जितमा विदेशी खेलाडी सोलोमन किङ र एरोन थापाले दुई–दुई गोल गरे भने समीर तामाङले एक गोल थपे। खेलको ४३औँ मिनेटमा सोलोमनले पहिलो गोल गर्दै चित्लाङलाई अग्रता दिलाएका थिए। पहिलो हाफमा १–० को अग्रता बनाएको चित्लाङले दोस्रो हाफमा थप आक्रामक खेल प्रस्तुत गर्‍यो।

७८औँ मिनेटमा एरोनले अग्रता दोब्बर बनाए भने त्यसको एक मिनेटपछि समीर तामाङले गोल गर्दै चित्लाङलाई ३–० को अवस्थामा पुर्‍याए। ८१औँ मिनेटमा एरोनले व्यक्तिगत दोस्रो गोल गर्दै टोलीलाई ४–० को बलियो अवस्थामा पुर्‍याए।

नवजनजागृतिका लागि ८३औँ मिनेटमा बिक्रम लामाले सान्त्वना गोल फर्काए पनि खेलमा फर्किन पर्याप्त भएन। खेलको ८७औँ मिनेटमा सोलोमनले व्यक्तिगत दोस्रो गोल गर्दै चित्लाङको सानदार जित सुनिश्चित गरे।

दुई गोलसहित उत्कृष्ट प्रदर्शन गरेका चित्लाङका सोलोमन किङ ‘प्लेयर अफ द म्याच’ घोषित भए। उनले नगद १० हजार रुपैयाँ पुरस्कार प्राप्त गरे। चित्लाङले प्रतियोगिताको प्रि–क्वाटरफाइनलमा विभागीय टोली एपीएफ क्लबलाई हराउँदै क्वाटरफाइनल प्रवेश गरेको थियो। त्यसपछि क्वाटरफाइनलमा साविकको बलियो टोली मछिन्द्र फुटबल क्लबलाई पराजित गर्दै सेमिफाइनल पुगेको थियो।

अब चित्लाङले उपाधिका लागि शनिबार हुने फाइनलमा सर्लाहीको बागमती युथ क्लबसँग प्रतिस्पर्धा गर्नेछ। बागमती युथले बुधबार भएको पहिलो सेमिफाइनलमा ललितपुरको फ्रेन्ड्स क्लबलाई टाइब्रेकरमा हराउँदै फाइनल यात्रा तय गरेको थियो।