आजबाट एसईई सुरुः मकवानपुरमा ७ हजार १९२ विद्यार्थी सहभागी हुँदै

१९ चैत, हेटौँडा । देशभर आज बिहीबारबाट माध्यमिक शिक्षा परीक्षा (एसईई) सुरु भएको छ । परीक्षा बिहान ८ बजेदेखि सुरु भएको हो । यस वर्ष मकवानपुर जिल्लाबाट ७ हजार १ सय ९२ जना विद्यार्थी एसईई परीक्षामा सहभागी हुँदैछन् । शिक्षा विकास तथा समन्वय इकाई मकवानपुरका अनुसार जिल्लाका सामुदायिक तथा संस्थागत गरी १ सय ४२ वटा विद्यालयका विद्यार्थीहरूले परीक्षा दिइरहेका छन् । तीमध्ये १ सय ५ वटा सामुदायिक र २७ वटा संस्थागत विद्यालयका विद्यार्थी सहभागी भएका हुन् ।

परीक्षामा नियमिततर्फ ५ हजार ५ सय २७ जना तथा ग्रेडवृद्धितर्फ १ हजार ६ सय ६५ जना विद्यार्थीले परीक्षा फाराम भरेको इकाइ प्रमुख सुदीप गिरीले जानकारी दिए । उनको अनुसार जिल्लाका १० वटा विद्यालयका विद्यार्थी प्राविधिक धारतर्फबाट एसईईमा सहभागी हुँदैछन् भने दुई वटा विद्यालयका विद्यार्थी पूर्ण रूपमा प्राविधिक धारको विषयमा मात्र परीक्षामा सामेल भएका छन् ।

इन्द्रसरोवर गाउँपालिकास्थित कालिका माध्यमिक विद्यालय र मकवानपुरगढी गाउँपालिकाको वंशगोपाल माध्यमिक विद्यालयका विद्यार्थीहरू प्राविधिक धारअन्तर्गत कृषि विषयमा मात्र परीक्षामा सहभागी भएका छन् । प्राविधिक धारतर्फ कुल २ सय ६२ जना विद्यार्थीले परीक्षा दिइरहेका छन् । तीमध्ये १ सय ७५ जना नियमित तथा ८८ जना ग्रेडवृद्धितर्फका विद्यार्थी रहेका छन् ।

एसईई सञ्चालनका लागि मकवानपुरमा २८ वटा परीक्षा केन्द्र तोकिएका छन् । हेटौँडा उपमहानगरपालिकामा सबैभन्दा बढी १५ वटा परीक्षा केन्द्र रहेका छन्था ने थाहा नगरपालिकामा ३ वटा, मनहरी र बकैया गाउँपालिकामा दुई–दुई वटा परीक्षा केन्द्र तोकिएका छन् । यस्तै बाँकी स्थानीय तहहरुमा एक–एक वटा परीक्षा केन्द्र निर्धारण गरिएको छ ।

तोकिएका केन्द्रमध्ये २ वटा संस्थागत विद्यालयमा र बाँकी २६ वटा परीक्षा केन्द्र सामुदायिक विद्यालयमा राखिएका छन् । यस वर्ष एसईईको उत्तरपुस्तिका परीक्षण स्थानीय तहमै गर्ने तयारी गरिएको छ। राष्ट्रिय परीक्षा बोर्डले परीक्षा सम्पन्न भएको दिनदेखि नै उत्तरपुस्तिका परीक्षण सुरु गर्ने योजना बनाएको शिक्षा विकास तथा समन्वय इकाईले जनाएको छ । यसका लागि केन्द्राध्यक्ष र विषयगत शिक्षकहरूलाई आवश्यक तयारी गर्न आग्रह गरिएको इकाइ प्रमुख सुदीप गिरीले बताए ।