विनासूचना छापा मारेकोमा मुख्यमन्त्रीको आपत्ति, अनुसन्धानमा सघाउँने

२१ वैशाख, हेटौँडा । बागमती प्रदेशका मुख्यमन्त्री इन्द्रबहादुर बानियाँले आफ्नो घर तथा कार्यालयमा भएको छापामारीप्रति आपत्ति जनाउँदै अनुसन्धानमा पूर्ण सहयोग गर्ने बताएका छन्।

मुख्यमन्त्री बानियाँले सोमबार प्रेस विज्ञप्ति जारी गर्दै सम्पत्ति शुद्धीकरण अनुसन्धान विभागले हेटौँडा र काठमाडौंस्थित आफ्नो निवास तथा आफू संलग्न रहेको बानियाँ निर्माण सेवाको कार्यालयमा छापा मारी कागजात नियन्त्रणमा लिएकोप्रति गम्भीर ध्यानाकर्षण भएको जनाएका छन्।

उनले आफू लामो राजनीतिक यात्रापछि हाल प्रदेश सरकारको प्रमुखका रूपमा जनताको सेवामा रहेको उल्लेख गर्दै सुशासन, पारदर्शिता र भ्रष्टाचारमुक्त समाज निर्माणलाई प्राथमिकतामा राखेर काम गर्दै आएको बताएका छन्।

‘सार्वजनिक खर्च कटौती र आर्थिक मितव्ययिताका लागि निरन्तर प्रयासरत रहेको तथा योजना र बजेटमा पारदर्शिता कायम गरिएको छ,’ उनले उल्लेख गरेका छन्। बानियाँले राज्यका सबै तहबिच समन्वय, सहकार्य र सहअस्तित्व आवश्यक रहेको उल्लेख गर्दै संघीय सरकारका सकारात्मक काममा सधैँ सहयोग रहने बताएका छन्।

आफ्नो राजनीतिक तथा व्यावसायिक जीवनबारे हुने छानबिनलाई सकारात्मक रूपमा लिएको उनको भनाइ छ। तर, विनापूर्वसूचना गरिएको छापामारीप्रति असन्तुष्टि जनाउँदै उनले यसले आफ्नो व्यक्तिगत तथा सामाजिक प्रतिष्ठामा असर परेको उल्लेख गरेका छन्। ‘राज्यका निकायले बोलाउँदा आफू उपस्थित हुने अवस्थामा अकस्मात् गरिएको छापामारीप्रति आपत्ति छ,’ विज्ञप्तिमा भनिएको छ।

उनले संवैधानिक र कानुनी दायराभित्र हुने हरेक अनुसन्धानमा पूर्ण सहयोग रहने दोहोर्‍याउँदै सर्वसाधारणलाई भ्रमित नहुन आग्रह गरेका छन्।