शिक्षा विकासको मुल आधारः मुख्यमन्त्री लामा

१६ फागुन, हेटौँडा । बागमती प्रदेशका मुख्यमन्त्री बहादुर सिंह लामा तामाङले शिक्षा बिना विकासको कल्पना गर्न नसकिने बताएका छन् । हेटौँडा उपमहानगरपालिका वडा नम्बर १० स्थित तुलसी मेहर मेमोरियल माध्यमिक विद्यालयको ४३ औं अभिभावक दिवसको अवसरमा आयोजित कार्यक्रममा बोल्दै मुख्यमन्त्री लामाले यस्तो बताएका हुन् ।

उनले शिक्षा नै विकासको मेरुदण्ड भएको उल्लेख गर्दै गलत शिक्षाबाट देश र समाजको पनि विकास नहुने बताए । मुख्यमन्त्री लामाले निजी विद्यालयहरुको शिक्षा क्षेत्रमा ठुलो योगदान रहेको भन्दै प्रशंसा गरे । निजी क्षेत्रका विद्यालयहरुले सामुदायिक विद्यालयहरुलाई ठुलो चुनौती थपेको उनको भनाई थियो ।

मुख्यमन्त्री लामाले विद्यालय शिक्षा प्रदेश सरकारको एकल अधिकार भित्र नपर्दा चाहे जति काम गर्न नसकेको बताए । स्थानीय र संघ सरकारको जति संरचना प्रदेश सरकारसंग नभएको समेत मुख्यमन्त्री लामाले गुनासो गरे । प्रदेश सरकारको एकल अधिकार अन्तर्गत रहेर विश्वविद्यालय स्थापनाको अवधारणा अघि सारेको उल्लेख गर्दे उनले केन्द्र र स्थानीय सरकारको संरचनामा टेकेर काम गर्नुपर्दा धेरै पापड बेल्नुपरेको दावी गरे ।

विद्यालयका प्रधानाध्यापक रघुनाथ खरालको सभाध्यक्षतामा भएको कार्यक्रममा ४ नम्बर वडा अध्यक्ष नवीन सिग्देल, १० नम्बर वडा अध्यक्ष फुर्वा दोर्जे लामा, प्याब्सन मकवानपुरका अध्यक्ष बिनोद सुवेदी, पत्रकार महासंघ मकवानपुरका अध्यक्ष बालकृष्ण अधिकारी लगायतको उपस्थिति रहेको थियो । उक्त अवसरमा विद्यालयका विद्यार्थीहरुले विविध मनोरञ्जनात्मक गीत, संगित र कला प्रस्तुत गरेका थिए ।