देशभर २४ घण्टामा चट्याङबाट ५ जनाको मृत्यु

२८ चैत, हेटौँडा । पछिल्लो २४ घण्टामा हावाहुरी र पानीसँगै परेको चट्याङका कारण देशभरमा ५ जनाको मृत्यु भएको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार विभिन्न पाँच जिल्लामा चट्याङका कारण ५ जनाको मृत्यु भएको हो ।

प्राधिकरणका अनुसार झापाको गौरादह नगरपालिका ५ स्थित बालुबथानमा एक ५४ वर्षीय पुरुषको चट्याङ लागेर मृत्यु भएको छ । यस्तै मोरङको कानेपोखरी गाउँपालिका–१ मा १२ वर्षीय बालकको मृत्यु भएको छ भने धनुषाको नगराईन नगरपालिका–८ अकौरामा ६० वर्षीया महिलाको खेतमा चट्याङ लागेर मृत्यु भएको छ ।

यता डोटीको सायल गाउँपालिका–६ दल्लेखमा एक ३३ वर्षीया महिलाको मृत्यु भएको हुँदा उक्त स्थानमा ७ जना घाइते भएका छन् । यसैगरी बझाङको बित्थडचिर गाउँपालिका–३ मा एक ७८ वर्षीया महिलाको चट्याङका कारण मृत्यु भएको छ भने त्यहाँ २ जना बालिका घाइते भएको प्राधिकरणले जनाएको ।