तरुण दलको शुभकामना दौडको उपाधि बकैयाका गोलेलाई

१ वैशाख, हेटौँडा । नयाँ वर्षको अवसरमा हेटौँडा उपमहानगरपालिका वडा नम्बर ६ चौघडामा भएको जिल्ला स्तरीय ५ किलो मिटर खुल्ला शुभकामना दौड प्रतियोगिताको उपाधि बकैया गाउँपालिका वडा नम्बर ५ का राजकुमार गोलेले जितेका छन् । तरुण दल हेटौँडा ६ नम्बर वडा इकाईको आयोजनामा भएको प्रतियोगिताको निर्धारित ५ किलो मिटरको दुरी १५ मिनेट ११ सेकेण्डमा पुरा गर्दै उपाधि जितेका हुन् ।

यस्तै थाहा नगरपालिकाका विजन सुनार र राक्सिराङ गाउँपालिकाका सुवास हेम्जन क्रमशः द्वितिय र तृतिय भए । द्वितिय भएका सुनारले निर्धारित दुरी १५ मिनेट ३५ सेकेण्ड र तृति हुने हेम्जनले १६ मिनेट १६ सेकेण्डमा पुरा गरे । प्रतियोगितामा प्रथम, द्वितिय र तृतिय हुनेहरुले क्रमशः १५ हजार, १० हजार र ५ हजारसहित सिल्ड, मेडल र प्रमाण पत्र प्राप्त गरेका छन् ।

यसैगरी प्रतियोगितामा सहमागी महिलाहरुको तर्फबाट हेटौँडा १३ की साधना लोप्चन र हेटौँडा १३ कै सविना मगर प्रथम र द्वितिय भएका थिए । उनीहरुलाई प्रोत्साहन स्वरुप क्रमशः एक हजार र पाँच सय रुपैयाँ प्रदान गरिएको नेपाल तरुण दल हेटौँडा ६ का पूर्व अध्यक्ष राजकुमार बास्तोलाले जानकारी दिए ।

तरुण दल हेटौँडा ६ नम्बर वडा अध्यक्ष कमल कोइरालाको साध्यक्षतामा भएको कार्यक्रममा कांग्रेस पार्टीका जिल्ला सभापति बुद्ध लामा, पार्टी सहसचिव इन्दिरा न्यौपाने, हेटौँडा–६ का वडा अध्यक्ष विष्णुबहादुर दाहाल, हेटौंडा–७ का वडा अध्यक्ष दामोदर गौतम लागाएतले प्रथम, द्वितिय र तृतिय भएकाहरुलाई नगद पुरस्कार सहित सिल्ड, मेडल तथा प्रमाण पत्र प्रदान गरेका थिए ।

नेपाल तरुण दल हेटौँडा ६ इकाई समितिले नेपाल एथ्लेटिक्स संघ मकवानपुरको प्राविधिक सहयोगमा प्रत्येक वर्ष नयाँ वर्षको अवसरमा शुभकामना खुल्ला दौड प्रतियोगिता गर्दै आएको छ ।