मकवानपुर गोल्डकपको हिसाब किताब डेढ वर्षपछि सार्वजनिक, हिसाब किताब छैन पारदर्शी 

६ वैशाख, हेटौंडा । प्रतियोगिता सम्पन्न भएको डेढ वर्षमा मकवानपुर गोल्डकपको हिसाब किताब सार्वजनिक भएको छ । शनिबार मकवानपुर जिल्ला फुटबल संघले पत्रकार सम्मेलन गर्दै मकवानपुर गोल्डकपको हिसाब किताब सार्वजनिक गरेको हो ।

संघको आयोजनामा गत २०८० माघमा सम्पन्न प्रतियोगिताको आम्दानी र खर्चको विवरण पत्रकार सम्मेलन मार्फत् सार्वजनिक गरिएको हो । मकवानपुरको १० वटा स्थानीय तहको आर्थिक सहयोगमा हुने गरेको उक्त गोल्डकपको आम्दानी खर्च भने हरेक वर्ष अपार्दशी हुने गरेको छ ।

छैठौ संस्करणको ‘सहीद स्मृती मकवानपुर राष्ट्रिय गोल्डकप’ फुटबल प्रतियोगित २०८० को आम्दानी तथा खर्च पनि पारदर्शी हुन सकेको देखिदैन । संघले सार्वजनिक गरेको गोल्डकपको आम्जानी तथा खर्च विवरणमा एकै प्रकृतिका खर्च शिर्षकहरु पटक पटक दोहोरीएका छन् भने नगरेको शिर्षकमा पनि खर्च भएको विवरण सार्वजनिक गरेको हो ।

संघले शनिबार सार्वजनिक गरेको गोल्डकको खर्च विवरणमा खेलाडी यातायात खर्च ४ लाख ३१ हजार ६०० रुपैयाँ देखाइएको छ भने बस भाडा खेलाडी शिर्षकमा पनि २ लाख २८ हजार रुपैयाँ खर्च भएको देखिाइएको छ ।

अतिथी तथा आयोजक खाजा खर्चमा १ लाख ९५ हजार रुपैयाँ खर्च भएको संघको विवरण रहेको छ भने स्वयसेवक खर्च शिर्षकमा १ लाख १९ हजार रुपैयाँ देखाइएको छ । संघले फ्लेक्स प्रिन्ट, गेट व्यानर खर्च शिर्षक २ पटक समावेश गरी प्रत्यक पटक २ लाख ६३ हजार ८८२ रुपैयाँ खर्च समावेश गरेको छ ।

प्रचार प्रशास अन्तर्गत विज्ञापन खर्चमा २ लाख ९७ हजार रुपैयाँ खर्च भएको संघको विवरणमा उल्लेख छ । जबकी उक्त समयमा गोल्डकपको विज्ञापन कुनै पनि माध्यमबाट औपचारिक रुपमा प्रचार प्रसार भएको थिएन ।

पत्रकार ट्रेनिङ शिर्षकमा ३ दिनको तालिम संचालन, टिसर्ट वितरण गर्दा १ लाख ५० हजार रुपैयाँ खर्च भएको संघको विवरणमा उल्लेख छ । जबकी उक्त ट्रेनिङमा न उपस्थितहरुलाई कुनै सुविधा प्रदान गरिएको थियो । न नै टिसर्ट वितरण गरिएको थियो ।

संघको खर्च विवरणमा मसलन्द वापत ३६ हजार ८७० रुपैयाँ खर्च भएको विवरण समावेश भएको छ भने सोही प्रकृतिको अर्को शिर्षक मसलन्द तथा अन्य शिर्षकमा १ लाख ७७ हजार १९८ रुपैयाँ खर्च भएको विवरण समावेश भएको छ । फुटबल संघले उक्त प्रतियोगिताको लागि ९१ लाम ४८ हजार ९४९ रुपैयाँ खर्च गरेको विवरण देखाएको छ ।

फुटबल प्रतियोगिता आर्थिक रुपमा घाटा भएको संघका कोषाध्यक्ष अमृत लुङबाले बताए । प्रतियोगिता आयोजना गर्न ९१ लाख ४८ हजार रुपैयाँ खर्च भएको छ भने जम्मा ८९ लाख २४ हजार रुपैयाँ आम्दानी भएको उनले बताए । प्रतियोगिताबाट २ लाख २४ हजार रुपैयाँ घाटा भएको कोषाध्यष लुङ्वाले बताए ।

स्थानीय तहले पत्याउनै छोडे

विवाद र अपादर्शीताका बिच फुटबल संघलाई सो प्रतियोगिता अन्तर्गत दिँदै आएको बजेट कटौती भएको देखिन्छ । २०८० को उक्त प्रतियोगिताको लागि मकवानपुरका गाउँपालिकाहरुले ३ लाख देखि ५ लाख रुपैयाँसम्म बजेट विनियोजन गर्ने गरेका थिए ।

हेटौंडा उपमहानगरपालिकाले २५ लाख रुपैयाँ र बागमती प्रदेश खेलकुद विकास परिषदले ५० लाख रुपैयाँ आर्थिक सहयोग दिएर सो गोल्डकप सम्पन्न हुने गरेको थियो । तर, पछिल्लो समय उक्त बजेट निरन्तर कटौटी भएको संघको आम्दानी विवरणमा उल्लेख छ ।

सो प्रतियोगिताको लागि मकवानपुरका ८ गाउँपालिका मध्ये ५ वटाले मात्र आर्थिक सहयो उपलब्ध गराएका छन् । ३ लाखदेखि ५ लाखसम्म आर्थिक समयोग दिने गाउँपालिकाहरुले न्युनमत १ लाख ७० हजार रुपैयाँ देखि अधिकतम ४ लाख ९२ हजार रुपैयाँ आर्थिक सहयोग दिएका छन् ।

गोल्डकपका लागि भीमफेदी गाउँपालीकाले ४ लाख ९२ हजार रुपैयाँ, कैलाश गाउँपालिकाले २ लाख ९५ हजार रुपैयाँ, बागमती गाउँपालिकाले २ लाख ७८ हजार रुपैयाँ, इन्द्रसरोबर गाउँपालिकाले २ लाख ४७ हजार रुपैयाँ र मकवानपुरगढी गाउँपालिकाले १ लाख ७० हजार रुपैयाँ आर्थिक सहयोग दिएको छ ।

त्यसबाहेक २५ लाख रुपैयाँ आर्थिक सहयोग दिँदै आएको हेटौंडा उपमहानगरपालिकाले १८ लाख ७५ हजार रुपैयाँ, बागमती प्रदेश खेलकुद विकास परिषदले ४५ लाख ९१ रुपैयाँ सहयोग उपलब्ध गराएको छ । मकवानपुरको बकैया गाउँपालिका, मनहरी गाउँपालिका, राक्सिराङ गाउँपालिका, थाहा नगरपालिकाले प्रतियोगिताको लागि दिँदै आएको बजेट कटौती गरेका छन् ।

संघका कोषाध्यक्ष लुङ्वाका अनुसार प्रतियोगिताको खर्च विवरणमा केही त्रुटिहरु रहेको बताए । केही खर्च शिर्षकहरु दोहोरिएको र केही खर्च शिर्षक मिलानमा प्राविधिक कमजोरी भएको बताए । खर्च मिलान गर्न केही शिर्षकहरु उस्तै प्रकृतिको देखिएको उनले बताए ।

गोल्डकपको आम्दानीका क्षेत्रहरु उठाउन समय लागेकाले हिसाब किताब सार्वजनिक गर्न समय लागेको उनले बताए । अझैपनि केही खर्चहरु फछ्यौट गर्न बाँकी रहेको र त्यसलाई पनि खर्चको विवरणमा समावेश गरिएको उनको भनाई छ । पत्रकार तालिम, विज्ञापन तथा प्रचार प्रसार लगायतका खर्चहरु पठाउन बाँकी नै रहेको उनले बताए ।

पछिल्लो समय प्रतियोगिताको लागि स्थानीय तहबाट बजेट उपलब्ध हुुनेक्रम घटिरहेको उनले बताए । स्थानीय हत आफै प्रतियोगिता आयोजना गर्ने कार्यमा अग्रसर रहेकाले प्रतियोगिताको बजेट घटेको उनको भनाई छ । पछिल्लो सयम स्थानीय तहको स्रोत पनि घटेकाले प्रतियोगिताको बजेट स्वतः गिरावट आएको उनले बताए ।