पाथीभरा जाँदै गरेको बोलेरोमा करेन्ट लाग्दा ४ जनाको मृत्यु

८ वैशाख, हेटौँडा । ताप्लेजुङको पाथीभरा दर्शनका लागि जाँदै गरेको बोलेरोमा करेन्ट लागेर आगलागी हुँदा ४ जनाको मृत्यु भएको छ । फुङलिङ नगरपालिका- १० स्थित सडक खण्डमा बिजुलीको तार झरेर मे १ ज ३०११ गाडीमा आगो लागेको थियो । घटनामा दुई जना घाइते भएका छन् ।

दुर्घटनामा परी मृत्यु हुनेमा चालक ताप्लेजुङको फुङलिङ नगरपालिका–१० का ४२ वर्षीय दुर्गा भट्टराई, यात्रुहरू ललितपुर महानगरपालिका–१० की १६ वर्षीया आध्या आचार्य, झापाको भद्रपुर नगरपालिका–१५ का ७० वर्षीय विनोद पौडेल र उनकी श्रीमती ६९ वर्षीया सरिता पौडेल रहेका छन् ।

यस्तै दुर्घटनामा परी ललितपुर महानगरपालिका १० की ४५ वर्षीया सबिना आचार्य गम्भीर घाइते भएकी छन् भने उनका छोरा १० वर्षीय भबिमय आचार्य पनि घाइते छन् । उनी बोल्न सक्ने अवस्थामा रहेको प्रहरीले जनाएको छ ।

सोमबार बिहानै यात्रु लिएर पाथीभरातर्फ जाँदै गरेको मे १ ज ३०११ नम्वरको जीप पाथीभरा क्षेत्रको सेवारो चोकमा बिजुलीको पोलबाट लत्रिएको तारमा छोएपछि आगलागी र दुर्घटनामा परेको थियो ।