राज्यले खेलको महत्व नबुझ्दा खेलाडी पलायन हुन बाध्यः मन्त्री महर्जनको

९ वैशाख, हेटौँडा । बागमती प्रदेशका युवा तथा खेलकुद मन्त्री मीनकृष्ण महर्जनले राज्यले खेलकुदको महत्व नबुझ्दा खेलाडी विदेश पलायन हुन बाध्य भएको धारणा राखेका छन् । बागमती प्रदेश खेलकुद विकास परिषद्को आयोजनामा मंगलबारबाट हेटौंडामा सुरु भएको खेलकुद पत्रकारिता सम्बन्धि क्षमता अभिवृद्धि कार्यक्रमको उद्घाटन गर्दै उनले यस्तो बताएका हुन् ।

सरकारमा रहेकाहरुले खेलकुदको महत्व बुझ्नै नसकेको उनको भनाई थियो । प्रदेश सरकारले पनि खेलकुद क्षेत्रलाई खासै महत्व नदिएको उनले गुनासो गरे । युवा तथा खेलकुद मन्त्रालयको सिलिङ बजेट जम्मा ६१ करोड रुपैयाँ मात्रै रहेको जानकारी दिँदै उनले यो निकै कम भएको दावी गरे । हरेक खेलको राष्ट्रिय टिममा रहेका ८० प्रतिशत खेलाडी बागमती प्रदेशभित्रको रहेको उनले बताए ।

बजेट दिने ठाउँमा भएकाहरुलाई खेलकुद बुझाउनै गारो भएको उनको भनाई थियो । यद्यपी बागमती प्रदेशका मुख्यमन्त्री भने खेलकुदप्रति ‘पोजेटिभ’ भएको महर्जनले बताए । मुख्यमन्त्री पोजेटिभ नभएको भए बागमती प्रदेशमा खेलकुदको गतिविधि नै नहुने उनको जिकिर थियो ।

कार्यक्रममा बागमती प्रदेश खेलकुद विकास परिषद्का सदस्य सचिव दीपक लामाले मुलुक संघीयतामा गएपनि खेलकुदमा अझै संघीयता आउन बाँकी रहेको धारणा राखे। कुन संरचना कसले हेर्ने भन्ने विषयमा प्रष्ट नहुँदा केही समस्या भैरहेको उनको भनाई थियो ।

बागमती प्रदेशभित्रका खेलकुद क्षेत्रमा कलम चलाउने पत्रकारका लागि क्षमता अभिवृद्धि कार्यक्रमको आयोजना गरिएको जानकारी दिँदै उनले यसले खेल पत्रकारलाई सहयोग पुग्ने विश्वास व्यक्त गरे । बागमती प्रदेशका पत्रकारहरुको उपस्थिती रहेको कार्यक्रम बुधबारसम्म सञ्चालन हुनेछ ।