हेटौंडामा ‘प्रदेश स्पोर्ट्स अवार्ड एन्ड युथ समिट’ आयोजना हुने

१ जेठ, हेटौंडा । बागमती प्रदेश सरकारअन्तर्गत युवा तथा खेलकुद मन्त्रालयले हेटौंडामा पहिलोपटक ‘प्रदेश स्पोर्ट्स अवार्ड एन्ड युथ समिट’ आयोजना गर्न लागेको छ। आइतबार हेटौंडा–४ स्थित हुप्राचौरमा हुने उक्त अवार्ड समारोहको बारेमा बिहीवार पत्रकार सम्मेलनमार्फत जानकारी दिइएको हो।

कार्यक्रमबारे जानकारी दिँदै युवा तथा खेलकुद मन्त्री मीनकृष्ण महर्जनले खेलाडी, प्रशिक्षक तथा खेल पत्रकारहरुको योगदानको सम्मान गर्न प्रदेशले यो पहल थालेको बताए। उनले प्रदेशबाट प्रतिभावान खेलाडीको विदेश पलायन रोक्न तथा खेलकुद क्षेत्रलाई प्रोत्साहन दिन अवार्ड कार्यक्रम महत्वपूर्ण हुने उल्लेख गरे।

अवार्ड समारोहमा वर्षका उत्कृष्ट महिला र पुरुष खेलाडी, उत्कृष्ट प्रशिक्षक, युवा खेलाडी, लोकप्रिय खेलाडी, उत्कृष्ट खेल पत्रकार, ‘बागमती खेलकुदको शान’ तथा ‘लाइफटाइम एचिभमेन्ट’ गरी आठ विधामा १२ जना व्यक्तित्वलाई सम्मान गरिनेछ।

मन्त्रालयका निमित्त सचिव सूर्यबहादुर दाहालका अनुसार उत्कृष्ट महिलारपुरुष खेलाडी, प्रशिक्षक, ‘बागमती खेलकुदको शान’ तथा ‘लाइफटाइम एचिभमेन्ट’ विधाका विजेतालाई जनही १ लाख रुपैयाँसहित सम्मान गरिनेछ भने अन्य विधामा जनही ५० हजार रुपैयाँ पुरस्कार प्रदान गरिनेछ।

खेल क्षेत्रको योगदान, सफलता, सामाजिक प्रभाव तथा नयाँ पुस्तालाई प्रेरणा दिन सक्ने आधारमा अवार्डको छनोट गरिने आयोजकले जनाएको छ। राष्ट्रिय तथा अन्तर्राष्ट्रिय खेलकुद संघका अध्यक्ष पत्रकार दीपक श्रेष्ठको संयोजकत्वमा गठित तीन सदस्यीय प्राविधिक उप–समितिले पुरस्कार एवं सम्मानित हुने खेलाडी तथा पत्रकारको नाम सिफारिस गर्नेछ।

कार्यक्रममा प्रमुख अतिथिको रूपमा बागमती प्रदेशका मुख्यमन्त्री बहादुर सिंह लामा उपस्थित हुने खेलकुद मन्त्री महर्जनले जानकारी दिए। युथ समिट भने केही सातापछि आयोजना गरिने मन्त्रालयले जनाएको छ।