चितवनमा बस र कार ठोक्किँदा एकजनाको मृत्यु

९ जेठ, हेटौँडा । चितवनको खैरहनी नगरपालिका–२ स्थित ज्यामिरे चोकमा गएराति यात्रुबाहक बस र इभि कार एक आपसमा ठोक्किँदा एकजनाको मृत्यु भएको छ।

पूर्व–पश्चिम राजमार्गमा शुक्रबार बिहान १ः४५ बजे भएको उक्त दुर्घटनामा कार चालक ४२ वर्षीय प्रतिप तिमिल्सिना गम्भीर घाइते भएका थिए। उपचारका क्रममा उनको मृत्यु भएको जिल्ला प्रहरी कार्यालय चितवनले जानकारी दिएको छ। उनी खैरहनी नगरपालिका–८ का स्थायी बासिन्दा भएको प्रहरीले जानकारी दिएको छ।

दुर्घटनामा उदयपुरबाट काठमाडौंतर्फ जाँदै गरेको बागमती प्रदेश ०१–००६ ख ७०२३ नम्बरको यात्रुबाहक बस र विपरीत दिशाबाट आउँदै गरेको बागमती प्रदेश ०१–०३० च ११५७ नम्बरको इभी कार एक आपसमा ठोक्किएका थिए।

प्रहरीले दुर्घटनापछि बस र त्यसका चालकलाई नियन्त्रणमा लिएको छ। घटनाबारे थप अनुसन्धान भइरहेको प्रहरीको भनाइ छ।