इन्डोस्कोपिक कम्बाइन्ड इन्ट्रारेनल सर्जरीबाट मिर्गौलाको पत्थरी निकालियो

९ जेठ, हेटौँडा । नेपाल मेडिकल कलेजमा पहिलो पटक ‘एन्डोस्कोपिक कम्बाइन्ड इन्ट्रारेनल सर्जरी विधिबाट मिर्गौलाको ठुलो पत्थरी सफलतापूर्वक निकालिएको छ । युरो सर्जरी विभागको टोलीले २३ वर्षीय लोप्साङ पाल्देनको बाँया मिर्गौलाबाट ६.९ सेन्टिमिटर आकारको पत्थरी हटाउन (ECIRS) प्रविधिको प्रयोग गरेको हो ।

बिरामी पाल्देन तीन साताअघि मिर्गौलामा गम्भीर समस्या देखिएपछि अस्पताल आएका थिए । उनलाई करिब दुई महिनादेखि पिसाब पोल्ने समस्या थियो । उपचारको क्रममा उनको बाँया मिर्गौलाको पेल्भिसमा ठूलो पत्थरी देखिएपछि डा. निरज सुवेदी र किड्नी ट्रान्सप्लान्ट सर्जन डा। वेश अन्सारीको नेतृत्वमा रहेको विशेषज्ञ टोलीले (ECIRS) प्रविधिबाट शल्यक्रिया गरेका थिए ।

डा। अन्सारीका अनुसार, ूपत्थरीको आकार र जटिल अवस्थाका कारण परम्परागत विधिबाट निकाल्न सम्भव नदेखिएकाले पेटको बाँया भाग र मुत्रनली दुबै स्थानमा सानो प्वाल पारेर पत्थरी निकालियो ।ू

के हो (ECIRS) प्रविधि ?
‘एन्डोस्कोपिक कम्बाइन्ड इन्ट्रारेनल सर्जरी’ एक अत्याधुनिक न्यून आक्रमक प्रविधि हो जसबाट ठूला र जटिल मिर्गौलाका पत्थरी (नेफ्रोलिथियासिस) हटाइन्छन् । जब पत्थरी एक स्थानबाट निकाल्न सकिँदैन, चिकित्सकले एउटै समयमा कम्मर (पोस्ट्रियर) र मुत्रनली (युरेथ्रा) दुवै स्थानबाट एन्डोस्कोप प्रयोग गरेर शल्यक्रिया गर्छन् ।

यो प्रविधिबाट बिरामीलाई कम पिडा हुने, ठूलो घाउ नबनाई सानो प्वालबाट नै शल्यक्रिया सकिने, छिटो घर फर्कन सकिने, संक्रमण र रक्तश्रावको जोखिम कम हुने तथा छिटो निको हुने विशेषता रहेको डा। अन्सारी बताउँछन् ।

नेपाल मेडिकल कलेजमा इन्डोस्कोपिक प्रविधिबाट मिर्गौलाको पत्थरी, प्रोस्टेट, मुत्राशय र पाठेघरसम्बन्धी विभिन्न जटिल शल्यक्रियाहरू गरिंदै आएका छन् । यो प्रविधि प्रयोग गरेर गरिएको पहिलो सफल शल्यक्रियाले संस्थाको चिकित्सा सेवामा नयाँ उपलब्धि थपेको अस्पताल प्रशासनले जनाएको छ ।