भुटनदेवी माविमा नवआगन्तुक विद्यार्थी र अभिभावकको स्वागत, उत्कृष्ट शिक्षक तथा विद्यार्थी सम्मानित

९ जेठ, हेटौँडा । हेटौँडा–४ स्थित भुटनदेवी माध्यमिक विद्यालयले नयाँ शैक्षिक सत्र २०८२ का लागि भर्ना भएका विद्यार्थी र तिनका अभिभावकलाई एक विशेष समारोहका बीच स्वागत गरेको छ । ओम्याक्स सिनेमा हलमा बिहीबार आयोजित कार्यक्रम बागमती प्रदेश सभा सदस्य एकालाल श्रेष्ठको प्रमुख आतिथ्यमा सम्पन्न भएको हो ।

विद्यालयका सहायक प्रधानाध्यापक भरत पोख्रेलले विद्यालयको हालको शैक्षिक अवस्था, उपलब्ध सुविधा, नीति तथा आचारसंहिता सम्बन्धी जानकारी दिए । उनका अनुसार चालु शैक्षिक सत्रमा विद्यालयमा करिब ४ सय जना नयाँ विद्यार्थी भर्ना भएका छन् ।

कार्यक्रममा विद्यालय व्यवस्थापन समितिका सदस्य नारायण तिमल्सिनाको अध्यक्षता, प्रदेशसभा सदस्य श्रेष्ठ र वडाध्यक्ष नवीन सिग्देलको आतिथ्य रहेको थियो । समारोहमा नवआगन्तुक विद्यार्थी तथा अभिभावकलाई विद्यालयप्रति विश्वास जगाउने उद्देश्यसहित व्यापक जानकारी र सांस्कृतिक प्रस्तुति समेत समावेश गरिएको थियो ।

उत्कृष्ट शिक्षक तथा विद्यार्थीलाई सम्मान
शैक्षिकसत्र २०८० को एसईई परीक्षामा ४ जीपीए ल्याउन सहयोग गर्ने शिक्षक तथा ९० प्रतिशतभन्दा बढी विद्यार्थी उत्तीर्ण गराउने विषय शिक्षक १० जनालाई जनही ५ हजार १ सय रुपैयाँसहित सम्मान गरिएको छ । त्यसैगरी पालिकास्तरीय परीक्षा २०८१ मा ४ जीपीए ल्याउने ४ जना विद्यार्थीलाई पनि जनही ५ हजार रुपैयाँ नगद पुरस्कार प्रदान गरिएको छ ।

कार्यक्रममा विद्यार्थीहरुले गायन र नृत्य प्रस्तुत गरी सांस्कृतिक र सिर्जनात्मक पक्ष प्रदर्शन गरेका थिए । विद्यालयका प्रधानाध्यापक माधवप्रसाद दाहालले विद्यालयको भावी योजनाका बारेमा जानकारी गराएका थिए ।

विद्यालयले गुणस्तरीय शिक्षासँगै विद्यार्थी, शिक्षक र अभिभावकको साझेदारीमा आधुनिक शिक्षण–शिक्षण प्रणालीलाई अघि बढाउने प्रतिबद्धता व्यक्त गरेको छ ।