सुशासनका लागि नीति परिवर्तन अपरिहार्यः डा. गङ्गालाल तुलाधर

११ जेठ, हेटौँडा । नेकपा (एकीकृत समाजवादी) का केन्द्रिय उपाध्यक्ष तथा पूर्वमन्त्री डा. गङ्गालाल तुलाधरले देशमा सुशासन कायम गर्न नीतिगत परिवर्तन आवश्यक रहेको बताएका छन् ।

एकीकृत समाजवादी बागमती प्रदेश कमिटीद्वारा हेटौँडामा आयोजित विचार गोष्ठीलाई सम्बोधन गर्दै डा. तुलाधरले देशमा पटक–पटक शासन परिवर्तन भए पनि जनताको अवस्था उस्तै रहेको उल्लेख गरे ।

“राणा शासनको अन्त्य भएको दशकौं बितिसक्यो, तर आज पनि जनताले अपमानित भएर बाँच्नुपरेको अवस्था छ, जुन निकै दुःखद हो,” उनले भने, “हेटौँडाबाट धेरै क्रान्तिहरूको थालनी भएको छ – चाहे त्यो कपडा उद्योगको आन्दोलन होस् वा हालैको सिमेन्ट उद्योग र अस्पतालको पक्षमा भएको आन्दोलन ।”

तुलाधरले गभर्नर नियुक्तिबारे पार्टी निर्देश अनुसार नभई व्यक्तिगत प्रभाव र धनबलका आधारमा निर्णय हुनु दुर्भाग्यपूर्ण रहेको बताए । उनले चितवन–१ बाट निर्वाचनमा पराजित विश्व पौडेललाई गभर्नर नियुक्त गर्नुले सुशासनको कल्पनासम्म गर्न नसकिने तर्क गरे ।

उनले समृद्धिको मूल उपाय कृषि, औद्योगिक क्रान्ति र पर्यटन उद्योगको विकास भएको उल्लेख गरे ।

कार्यक्रममा बोल्दै अखिल नेपाल महिला संघ समाजवादीकी केन्द्रीय अध्यक्ष मुनु सिग्देलले वर्तमान सरकार विकासको बाधक बनेको आरोप लगाइन् । “संविधान परिवर्तन गर्दै जनताको सार्वभौमिकता र मौलिक हक सुनिश्चित गर्नुपर्नेमा, अहिले उल्टै ती अधिकार कुण्ठित हुने गरी सरकार काम गरिरहेको छ,” उनले भनिन् ।

गोष्ठीमा अन्य वक्ताहरूले यथास्थितिवादको विरोध गर्दै जनतामा मौलिक हकको प्रत्याभूति दिलाउन पार्टीले अग्रसरता लिनुपर्नेमा जोड दिए ।

कार्यक्रम पार्टीका बागमती प्रदेश उपाध्यक्ष राजु श्रेष्ठको अध्यक्षतामा सम्पन्न भएको थियो । कार्यक्रममा केन्द्रिय सदस्य रामचन्द्र बल, अशोक थापा, पार्वती सिलवाल, जिल्ला अध्यक्ष विष्णु प्रसाद दाहाल, चितवन जिल्ला अध्यक्ष नरेन्द्र कन्यङ्गवा, प्रदेश सदस्य माधव तिमल्सिना, कल्पना विश्वकर्मालगायतको उपस्थिति रहेको थियो ।