पुरानो रिसवीले थाहामा देवरले गरे भाउजुको हत्या

५ असार, हेटौँडा । घरेलु विवादका कारण मकवानपुरको थाहा नगरपालिका वडा नम्बर १ कुन्छालमा नातामा देवर पर्ने एकजना युवाले धारिलो हतियारको प्रयोगबाट भाउजुको विभत्स हत्या गरेका छन् । बिहीबार दिउँसो २ः२० बजेतिर ५० वर्षीया स्थनीय तुलमाया गोपालीको छिमेकी आफ्नै देवर पर्ने बिमलमान गोपालीले खुकुरी प्रहार गरी निर्मम ढंगबाट हत्या गरेका हुन् ।

बिमलमानको खुकरी प्रहारबाट तुलमायाको शरिरबाट टाउको छुट्टिएको प्रहरीले जनाएको छ । घटनाबाट स्थानीय स्तब्ध भएका छन् । घटनाको जानकारी पाएलगत्तै स्थानीयले प्रहरीलाई खबर गरेका थिए । इलाका प्रहरी कार्यालय पालुङका प्रहरी निरीक्षक सबिनबाबु अर्याल र अस्थायी प्रहरी पोस्ट बज्रबाराहीका प्रहरी निरीक्षक सन्तु कुमार लामाको नेतृत्वमा प्रहरी टोली तुरुन्तै घटनास्थल पुगेको थियो ।

मकवानपुर प्रहरी प्रवक्ता डिएसपी श्यामु अर्यालका अनुसार हत्या गरेपछि फरार भएका ३५ वर्षीय बिमलमानलाई प्रहरीले करिब पौने चारबजे थाहा नगरपालिका वडा नम्बर ३ स्थित थानाबजारबाट खुकुरीसहित पक्राउ गरेको थियो । उनलाई अहिले अनुसन्धानका लागि इलाका प्रहरी कार्यालय पालुङमा राखी सोधपुछ गरिएको प्रवक्ता अर्यालले जानकारी दिए ।

घटनास्थलको प्रारम्भिक अनुसन्धानपछि मृतक तुलमायाको शव पोष्टमार्टमका लागि काठमाडौंस्थित शिक्षण अस्पताल पठाइएको छ । प्रहरीका अनुसार मृतकको माइती पनि कुन्छालमै रहेको छ । अनुसन्धान प्रारम्भिक चरणमै भए पनि घटनाको पछाडि पारिवारिक मनमुटाव वा पुरानो विवाद रहेको प्रहरीले आशंका गरेको छ ।

पक्राउ परेपछि प्रहरीको सोधपुछका क्रममा बिमलमानले आफ्नो घर बिग्रिनुमा तुलमायाको हात रहेकाले हत्या गरेको बताएका छन् । मकवानपुर प्रहरी प्रवक्ता अयालले बिमलमानको श्रीमतिसँग संबन्ध बिच्छेद भएको र उनीसँग ७ बर्षको छोरो रहेको जानकारी दिए । लागूऔषधको प्रयोगकर्ता समेत रहेका बिमलमान केहि समय रिहाबमा समेत रहेको बुभिएको प्रवक्ता अर्यालले बताए ।

उनका अनुसार पुरानै घरयासी समस्याका कारण बिमलमानले नातामा भाउजु पर्ने तुलमायाको हत्या गरेको हुनसक्ने प्रारम्भिक अनुसन्धानबाट खुलेको जानकारी दिए । यद्यपी घटनाको बारेमा प्रहरीले थप तथ्य संकलन गरिरहेको उनले बताए ।