मकवानपुरको एसइई नतिजामा गत वर्षभन्दा सुधार, राष्ट्रिय नतिजाभन्दा अझै कमजोर

१४ असार हेटौंडा । माध्यमिक शिक्षा परिक्षा (एसईई) २०८१ मा मकवानपुरका ४६.८६ प्रतिशात विद्यार्थी ११ कक्षामा भर्ना हुन योग्य भएका छन् । शुक्रवार साझ सार्वजनिक नतिजाअनुसार जिल्लाका कुल पाँच हजार ८८७ परीक्षार्थीमध्ये दुई हजार ७५९ जना उत्तीर्ण भएका छन् ।
यसवर्ष मकवानपुरले गत वर्षभन्दा नतिजामा सुधार ल्याएको छ । गत शैक्षिकसत्रमा मकवानपुरका पाँच हजार  सात सय ५२ जना विद्यार्थी माध्यमिक शिक्षा परीक्षा (एसइई)मा सहभागी भएकामा ३६.४७ प्रतिशात विद्यार्थी मात्रै ११ कक्षामा भर्ना हुन योग्य भएका थिए । अर्थात दुई हजार ९८ जना उत्तीर्ण हुँदा तीन हजार ६ सय ५४ जना विद्यार्थी कक्षा ११ भर्ना हुन नपाउने अर्थात् ननग्रेडेड (एनजी) भएका थिए ।
शिक्षा विकास तथा समन्वय इकाई मकवानपुरले दिएको जानकारी अनुसार शैक्षिक वर्ष २०८१ को एसईई परीक्षामा मकवानपुरबाट सामान्य शिक्षातर्फ पाँच हजार ६५८ जना र प्राविधिक शिक्षातर्फ २२९ जना परीक्षार्थी सहभागी भएका थिए । यसमध्ये सामान्यतर्फ दुई ६६२ र प्राविधिकतर्फ ९७ जना विद्यार्थी सफल भएका हुन् ।
यस्तै इकाईका अनुसार जिल्लाको तीन हजार १२८ जना विद्यार्थीको एसईई इन्कम्प्लिट भएको छ । जसमा सामान्यतर्फ दुई हजार ९९६ र प्राविधिकतर्फ १३२ जना छन्  । मकवानपुरबाट ४ जिपिए ल्याउने विद्यार्थीको संख्या ५ रहेको छ ।
यसैगरी यस शैक्षिकसत्रमा मकवानपुरबाट ३६७ जनाले ३.६ देखि ४.० जिपिए, ५८८ जनाले ३.२ देखि ३.६ जिपिए र ९६१ जनाले २.८ देखि ३.२ जिपिए ल्याएका छन् । यस्तै २.४ देखि २.८ जिपिए ल्याउनेको संख्या ५३९ रहेको छ भने २.० देखि २.४ जिपिए ल्याउनेको संख्या २९९ छ ।
यसवर्ष पनि मकवानपुरको नतिजा राष्ट्रिय नतिजा भन्दा भने कमजोर देखिएको छ । राष्ट्रिय नतिजाअनुसार कुल ६१.८१ प्रतिशत विद्यार्थी कक्षा ११ मा भर्ना हुन योग्य रहेको पाइए पनि मकवानपुरका जम्मा ४६.८६ प्रतिशात विद्यार्थी मात्रै कक्षा ११ मा भर्ना हुन योग्य भएका छन् ।
यसअघि गत वर्ष ४७.८६ प्रतिशत विद्यार्थी कक्षा ११ मा भर्ना हुन योग्य हुँदा मकवानपुरका जम्मा ३६.४७ विद्यार्थी मात्रै कक्षा ११ मा भर्ना हुन योग्य भएका थिए ।