बागमती प्रदेश सरकारद्वारा ओलम्पियनलाई मासिक भत्ता दिने घोषणा

१५ असार, हेटौंडा । बागमती प्रदेश सरकारले आफ्ना ओलम्पियन खेलाडीलाई मासिक रुपमा भत्ता दिने भएको छ । प्रदेशका मुख्यमन्त्री बहादुर सिंह लामा तामाङ र युवा तथा खेलकुद मन्त्री मीनकृष्ण महर्जनले ओलम्पियनलाई मासिक ५ हजार रुपैयाँको दरले भत्ता उपलब्ध गराउने घोषणा गरेका हुन् ।

नेपाल ओलम्पियन्स एसोसिएसनको संयोजन र बागमती प्रदेश खेलकुद परिषद्को आयोजनामा चितवनको सौराहामा भएको ‘स्कुल टु ओलम्पिक’ कार्यक्रमको समापन समारोह तथा चौथो ओलम्पियन पुनर्मिलन र सम्मान कार्यक्रममा बोल्दै मुख्यमन्त्री लामाले उक्त घोषणा गरेका हुन् ।

यसअघि गण्डकी प्रदेशले दुई वर्षदेखि ओलम्पियनलाई मासिक ५ हजार रुपैयाँ भत्ता दिँदै आएको छ भने सुदूरपश्चिम प्रदेशले पनि हालै मासिक भत्ता उपलब्ध गराउने योजना सार्वजनिक गरेको छ ।

कार्यक्रममा सन् १९९२, १९९६ र २००० का ओलम्पिक खेलमा सहभागी अनिता श्रेष्ठ, सिताराम शाही, विमला राना मगर, भगवती खत्री र ज्ञानबहादुर बोहोरालाई सम्मान गरिएको थियो । त्यस्तै, १९९६ का ओलम्पियन स्वर्गीय सुनिललाल जोशीलाई मरणोपरान्त उनको परिवारमार्फत सम्मान प्रदान गरिएको थियो ।

कार्यक्रममा मुख्यमन्त्री लामा, युवा तथा खेलकुदमन्त्री महर्जन, प्रदेश खेलकुद परिषद्का सदस्य-सचिव दीपक लामा, ओलम्पियन एसोसिएसनका अध्यक्ष दीपक विष्ट लगायतको सम्मानित ओलम्पियनहरुलाई सम्मानपत्र र दोसल्ला ओढाएर सम्मान गरेका थिए ।

सोही अवसरमा अध्यक्ष विष्ट र कीर्तिमानी धावक बैकुण्ठ मानन्धरले पेरिस ओलम्पिकमा सहभागी हुने ७ खेलाडीमध्ये ३ जना खेलाडिहरु एथलेटिक्सकी सन्तोषी श्रेष्ठ, जुडोकी मनिता श्रेष्ठ प्रधान र ब्याडमिन्टनका प्रिन्स दाहाललाई ओएलवाईको पिन तथा प्रमाणपत्र प्रदान गरेका थिए ।

कार्यक्रमको अवसरमा बिहान चितवनमा ‘वाकाथन’ समेत आयोजना गरिएको थियो । सौराहाको हात्तीचोकबाट सुरु भई रिभरसाइडसम्म सम्पन्न उक्त वाकाथनमा मुख्यमन्त्री लामा, खेलकुद मन्त्री महर्जन, रत्ननगर नगरपालिकाका मेयर प्रह्लाद सापकोटा, ओलम्पियन खेलाडी, विभिन्न संघ संस्थाका प्रतिनिधिहरू तथा स्थानीयवासीको सहभागिता रहेको थियो ।

नेपाल ओलम्पियन्स एसोसिएसनले चार वर्षअघि कर्णालीको सुर्खेतबाट सुरु गरेको ‘स्कुल टु ओलम्पिक’ कार्यक्रमको समापन पनि सोही दिन सम्पन्न गरिएको हो ।