ब्रेकफेल भएर लहरी दुर्घटना हुँदा चालकको मृत्यु

१७ असार, हेटौँडा । हेटौँडामा भारतीय लहरी गाडी दुर्घटना हुँदा चालकको मृत्यु भएको छ । मृत्यु हुनेमा भारतको बनारसबाट रिद्धिसिद्धि सिमेन्ट उद्योगका लागि कोइला बोकेर आइरहेको यूपी ६१ एटी ०९६२ नम्बरको लहरी ट्रकका चालक भारतको गाजीपुर पुरैनियाका ४० वर्षीय महेन्द्र यादव रहेका छन् ।

मकवानपुर प्रहरीका अनुसार मंगलबार बिहान करिब साँढे दुई बजेतिर हेटौँडा उपमहानगरपालिका वडा नम्बर १५ स्थित रातोमाटेमा ब्रेकफेल भई पूर्व–पश्चिम राजमार्ग अन्तर्गत चार्जिङ पोइन्ट नजिकै सडकको दाहिनेतर्फ पल्टिएको थियो । दुर्घटनामा घाइते भएका महेन्द्र यादवलाई अचेत अवस्थामा उद्धार गरी हेटौँडा अस्पताल पु¥याइएको थियो ।

उनको उपचारको क्रममा बिहान् पौने ६ बजे मृत्यु भएको मकवानपुर प्रहरी प्रवक्ता डिएसपी श्यामु अर्यालले जानकारी दिए । दुर्घटनामा सामान्य घाइते भएका गाडीका सहचालक गाजीपुर (भारत) घर भएका २५ वर्षीय मनोज यादवको हेटौँडा अस्पतालमा उपाचार भइरहेको छ । मृतकको शव हाल हेटौँडा अस्पतालको शवगृहमा राखिएको प्रहरीले जनाएको छ ।