बकैयाको गरगरेमा आगलागी, दुई करोड बराबरको क्षति, एकजना गम्भीर घाइते

२० भदौ, हेटौंडा । मकवानपुरको बकैया गाउँपालिका वडा नम्बर ५, गरगरेस्थित लिलाराम जिम्बाको किराना पसलमा आज बिहान आगलागी हुँदा करिब दुई करोड बराबरको क्षति भएको छ ।

मकवानपुर प्रहरीका अनुसार शुक्रबार बिहान घरमा पुजा गर्दा बालेको दियोमा पेट्रोल राखेको ड्रम पल्टेर पर्दा आगलागी सुरु भएको हो । आगो नियन्त्रणमा लिन इलाका प्रहरी कार्यालय गरगरेका प्रहरी टोली, हेटौंडा उपमहानगरपालिकाको दमकल, फापरवारी र हात्तिसुडे प्रहरी चौकीको थप टोली र बागमती गाउँपालिकाको दमकल खटिएका थिए ।

करिब दुई घण्टापछि आगो पूर्ण रूपमा निभाइएको मकवानपुर प्रहरी प्रवक्ता डिएसपी श्यामु अर्यालले जानकारी दिए । उनका अनुसार आगलागीमा परि पसल संचालक ४५ वर्षीय लिलाराम जिम्बा गम्भीर घाइते भएका छन् ।

उनको हात र खुट्टा दुवै भाग पोलिएको छ । प्रारम्भिक उपचारपछि चुरेहिल अस्पतालमा भर्ना गरिएको र शरीरको ४० प्रतिशत भाग जलेको हुँदा थप उपचारका लागि काठमाडौँस्थित किर्तिपुर बर्न अस्पतालमा रेफर गरिएको प्रवक्ता अर्यालले बताए ।

आगलागीबाट जिम्बाको दुई तले पक्की घर, हातेमालो सहकारीबाट ल्याइएका करिब १५ लाख नगद, ३० वटा ग्यास सिलिन्डर, पेट्रोल, डिजेल, खाद्यान्न, लत्ता कपडा, फर्निचर लगायतका सामान नष्ट भएका छन् ।

साथै, घरभित्र रहेको बा.प्र.०३–००६ प १८९७ नम्बरको पल्सर मोटरसाइकल र किनमेलका लागि आएका नारायण बहादुर स्याङ्तानको नाममा दर्ता भएको ना.४९ प १३ नम्बरको मोटरसाइकल पनि जलेर नष्ट भएको छ ।

आगलागीमा करिब दुई करोड रुपैयाँ बराबरको धनमाल क्षति भएको अनुमान गरिएको छ । साथै, पसलमा रहेको एकवटा कुकुरको बच्चा समेत जलेर मृत्यु भएको छ ।