जेन–जी प्रदर्शनको घटनापछि गृहमन्त्री लेखकको राजीनामा

२३ भदौ, हेटौँडा । जेन–जी पुस्ताले देशभर गरेको प्रदर्शन हिंसात्मक बन्दै ठूलो जनधनको क्षति भएको घटनापछि गृहमन्त्री रमेश लेखकले पदबाट राजीनामा दिएका छन्।

सरकारका एक मन्त्रीका अनुसार मन्त्री लेखकले सोमबार साँझ बसेको मन्त्रिपरिषद् बैठकमै आफ्नो राजीनामा प्रधानमन्त्री केपी शर्मा ओलीसमक्ष बुझाएका हुन्।

उनले जेन–जी आन्दोलनका क्रममा १९ जनाको मृत्यु भएको घटनाप्रति गहिरो दुःख व्यक्त गर्दै त्यसको नैतिक जिम्मेवारी लिनुपर्ने भन्दै राजीनामा दिएका हुन् । सोमबार भएको प्रदर्शन हिंसात्मक रूप लिँदा देशभर कम्तीमा १९ जनाले ज्यान गुमाएका छन् ।

घटनामा तीन सयभन्दा बढी घाइते भएका छन् । विभिन्न सहरमा सुरक्षा निकाय र प्रदर्शनकारीबीच भएको झडपका क्रममा गोलीसमेत चल्दा ठूलो जनधनको क्षति भएको हो।