जेन जी आन्दोलनबाट क्षती पुगेका संरचनाको मुख्यमन्त्री बानियाँले गरे निरिक्षण दोषीलाई कारवाहिको दायरामा ल्याइने

२ असोज, हेटौँडा ।  बागमती प्रदेशका मुख्यमन्त्री इन्द्रबहादुर बानियाँले जेनजी आन्दोलनका क्रममा २४ मा भएको तोडफोड र आगजनीबाट सरकारी र नीजि संरचनाहरुमा पुगेको क्षतिको बिहीबार स्थलगत निरीक्षण गरेका छन् । प्रदेशका मन्त्रीहरुसहित पुगेका उनले प्रदेशसभा सचिवालय, सामाजिक विकास मन्त्रालय, स्वास्थ्य मन्त्रालय, सहकारी तथा गरिबी निवारण मन्त्रालयको निरीक्षण गरेका छन् ।

यस्ते मुख्यमन्त्री बानियाँले भौतिक पूर्वाधार मन्त्रालय, कृषी तथा पशु पन्छि मन्त्रालय, श्रम रोजगार तथा यातायात मन्त्रालय, खानेपानी तथा उर्जा मन्त्रालय, आन्तरिक मामिला तथा कानुन मन्त्रालय, आर्थिक मामिला तथा योजना मन्त्रालय, वन तथा वातावरण मन्त्रालय, मदन भण्डारी स्वास्थ्य विज्ञान प्रतिष्ठान तथा हेटौँडा १ चौकिटोलमा रहेको भाटभटनीको समेत निरीक्षण गरेका छन् । आन्दोलनको क्रममा बागमती प्रदेश सरकार अन्तर्गतका ९ वटा मन्त्रालय र मातहतका कार्यालयहरुमा तोडफोड तथा आगजनी भएको थियो । त्यस क्रममा सरकारी भवनहरु, फर्निचर, फाइल कागजात र सवारी साधनमा ठूलो क्षति पुगेको छ ।

निरीक्षणसँगै मुख्यमन्त्री बानियाँले मन्त्रालयका सचिव तथा कार्यालयका प्रमुखहरुसँग संरचनागत अवस्थाको बारेमा जानकारी लिएका थिए । क्षतीग्रस्त संरचनाहरुको स्थल अवलोकनपछि मुख्यमन्त्री बानियाँले जेनजी आन्दोलनका नाममा भएको अराजक गतिविधिले प्रदेशमा ठूलो क्षति पुगेको बताए । उनले यथासिघ्र क्षतिको मूल्यांकन गरेर पुनःनिर्माणको प्रक्रिया अघि बढाउने स्पष्ट पारे । भौतिक संरचना पुनःनिर्माणको प्रभावकारी कार्यान्वयन र सेवाग्राही प्रभावित नहुने गरी आवश्यक कदम चालिने उनको भनाई छ ।

‘जेनजी आन्दोलनका नाममा भएको तोडफोड र आगजनीका कारण प्रदेशमा ठूलो क्षति पुगेको छ । क्षति पुगेका संरचनाको पुनःर्निर्माणका लागि सबै क्षेत्रबाट सहयोग आवश्यक छ,’ उनले भने, ‘प्रदेश मातहतका भौतिक संरचना पुनर्निर्माणमा संघ सरकारले लिने नीति र प्रदेशलाई विनियोजन हुने बजेटअनुसार थप योजना बनाएर अघि बढ्नेछौं ।’ धेरै कार्यालयहरु तत्काल सेवा दिन सक्ने अवस्थामा नरहे पनि नागरिकलाई असुविधा नहोस् भन्नका लागि जतिसक्दो छिटो काम गरेर निकास दिने मुख्यमन्त्री बानियाँको दावी छ । ‘कुनैपनि वाहानामा काम रोकिँदैन,’ उनले भने ।

यस्तै मुख्मयन्त्री बानियाँले जेनजी युवाले अघि सारेका मागहरू जायज भएपनि त्यसको आडमा गैरराजनीतिक तत्वहरूले लुटपाट र आतंक मच्चाएको भन्दै त्यस्तो कार्य अस्वीकार्य भएको बताए । उनले त्यस्ता अराजनीतिक गतिविधि गर्नेहरूलाई छोड्न नहुने भन्दै राज्यले कानुनको दायरामा ल्याएर कडा कारबाही गर्ने चेतावनी पनि दिए । साथै, मुख्यमन्त्री बानियाँले जेनजीका जायज मुद्दा र माग सम्बोधनमा सबै तहका सरकार गम्भीर हुनुपर्नेमा पनि जोड दिए