कान्तिलोकपथ र हेटौंडा–भैसे–काठमाडौं रुटमा तीन दिन राति सवारी आवागमनमा रोक

१७ असोज, हेटौँडा । जिल्ला प्रशासन कार्यालय मकवानपुरले प्राकृतिक विपदको जोखिमलाई मध्यनजर गर्दै कान्तिलोकपथ र हेटौंडा–भैसे–काठमाडौं सडकखण्डमा तीन दिन रातिको समयमा सवारी आवागमन रोक्ने निर्णय गरेको छ ।

प्रशासनले सार्वजनिक गरेको सूचनाअनुसार कान्तिलोकपथमा आज शुक्रबार अपरान्ह ४ बजेदेखि असोज २० गते बिहान ६ बजेसम्म रातिको समयमा कुनै पनि सवारी साधन सञ्चालन गर्न नपाइनेछ ।
त्यस्तै हेटौंडा–भैसे–काठमाडौं सडक खण्डमा आजै साझ ५ बजेदेखि २० गते बिहान ६ बजेसम्म सवारी साधन सञ्चालन नगर्न आग्रह गरिएको छ ।

मौसम विज्ञान विभागले असोज १५ गते जारी गरेको पूर्वानुमान सूचनामा आगामी दिनहरूमा भारी वर्षा र पहिरोको जोखिम उच्च रहेको जानकारी दिएपछि प्रशासनले यस्तो कदम चालेको हो । जिल्ला प्रशासन कार्यालय मकवानपुरले नदी तटीय क्षेत्रमा बसोबास गर्ने स्थानीयलाई धनजनको क्षति हुन नदिन विशेष सुरक्षा सतर्कता अपनाउन अनुरोध गरेको छ ।

साथै, विपद् व्यवस्थापन र पूर्वतयारीका लागि जिल्लाभरका सबै सुरक्षा निकाय, स्थानीय तह र स्वयंसेवकलाई समन्वयमा रहन पनि निर्देशन दिइएको सूचनामा उल्लेख छ ।