बालेन र सुदनविरुद्ध अनेरास्ववियुको जाहेरी, प्रहरीले दर्ता गरेन

२२ असोज, हेटौँडा । काठमाडौंपछि मकवानपुरमा पनि काठमाडौं महानगरका प्रमुख बालेन साह र ‘हामी नेपाल’ का संस्थापक सुदन गुरुङविरुद्ध जाहेरी दर्ता गर्ने प्रयास गरिएको छ । अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) मकवानपुरले बुधबार जिल्ला प्रहरी कार्यालय मकवानपुरमा जाहेरी दिएको हो ।

अनेरास्ववियु मकवानपुरका संयोजक नवराज शर्मा पौडेलले प्रहरी प्रमुख प्रहरी उपरीक्षक (एसपी) सुवासचन्द्र बोहरालाई जाहेरी बुझाएका बताए । जाहेरीमा बालेन साह र सुदन गुरुङले गत भदौ २३ र २४ गते काठमाडौंमा भएको जेनजी आन्दोलनका क्रममा सहभागी विद्यार्थी र युवालाई उक्साएर सार्वजनिक र निजी सम्पत्तिमा क्षति पुर्‍याउने र मानवीय क्षति हुने गरी हत्या गराएको आरोप लगाइएको छ ।

संयोजक पौडेलका अनुसार जाहेरीमा मुलुकी अपराध संहिता, २०७४ का दफा १७७, १७८, २४४ र २८५ बमोजिम ‘अपराधिक उपद्रव’ को अभियोग लगाउन माग गरिएको छ। तर, जिल्ला प्रहरी कार्यालय मकवानपुरले सो जाहेरी दर्ता गरेको छैन । एसपी बोहराले घटनाको कार्यक्षेत्र मकवानपुर नभएको कारण जाहेरी दर्ता गर्न नमिल्ने बताएका छन् । काठमाडौँमा भएको घटनाको विषयलाई लिएर उजुरी दिन आउनु भएकाले मकवानपुरबाट मुद्दा दर्ता गर्न मिल्दैन,’ उनले भने ।

संयोजक पौडेलले भने सरकारी वकिल कार्यालयसँग कानुनी परामर्श लिएपछि आगामी कदम चाल्ने बताए । उनका अनुसार एसपी बोहराले भोलि बिहान ११ बजे छलफलका लागि बोलाएका छन् । यसअघि मंगलबार अनेरास्ववियु केन्द्रीय कमिटीले काठमाडौंमा पनि बालेन र सुदनविरुद्ध जाहेरी दिएको थियो । सोभन्दा अघि तत्कालीन प्रधानमन्त्री केपी शर्मा ओली र तत्कालीन गृहमन्त्री रमेश लेखकविरुद्ध समेत सोही प्रकृतिको जाहेरी दर्ता गरिएको थियो ।