सरकारको लक्ष्य पूरा गर्नु सबैको दायित्वः अध्यक्ष मुक्तान

२३ असोज, हेटौँडा । कैलाश गाउँपालिकाका अध्यक्ष लोकबहादुर मुक्तानले सरकारले लिएको लक्ष्य पूरा गर्नु सबैको साझा दायित्व रहेको बताएका छन् । विहीबार गाउँपालिकामा स्वास्थ्य शाखाले आयोजना गरेको आ।व। २०८१र०८२ को स्वास्थ्य कार्यक्रमको वार्षिक समीक्षा कार्यक्रममा बोल्दै अध्यक्ष मुक्तानले सरकारको योजना सफल बनाउन जनप्रतिनिधि र कर्मचारी दुवैले प्रतिबद्धता जनाउनुपर्ने बताएका हुन्।

उनले वडास्तरका स्वास्थ्य चौकीहरूमा सेवा प्रवाह सुदृढ गर्न र तथ्याङ्क व्यवस्थापनमा विशेष ध्यान दिन आग्रह गरे। “तथ्याङ्क तलमाथि भएमा ठूला समस्या आउन सक्छन्, त्यसैले सबै तथ्याङ्क चुस्त(दुरुस्त राख्नुपर्छ,” अध्यक्ष मुक्तानले भने। उनका अनुसार स्वास्थ्य क्षेत्रमा गुणस्तरीय कामका कारण गाउँपालिकाको वित्तीय समानीकरण अनुदान वृद्धि भएको छ। चालु आर्थिक वर्षमा पनि सोही स्तर कायम राख्दै सुत्केरी पोषण कार्यक्रम, होम डेलिभरी शून्य बनाउने अभियान, बालबालिकाका स्वास्थ्य सेवा र जेष्ठ नागरिकका कार्यक्रमहरू प्रभावकारी रूपमा अघि बढाइने बताए।

गाउँपालिकाले स्वास्थ्य र शिक्षासँगै खानेपानी, उद्यम विकास र सीपमूलक तालिमका क्षेत्रमा पनि विभिन्न गैरसरकारी संस्थासँग सहकार्य गर्दै आएको उनले जानकारी दिए। साथै, १० शैयाको अस्पताल सञ्चालनको तयारी अन्तिम चरणमा पुगेको पनि बताए।

समीक्षा कार्यक्रममा गाउँपालिकाका १० वटै वडाले आ–आफ्ना स्वास्थ्य कार्यक्रमका कार्यसम्पादन विवरण प्रस्तुत गरेका थिए। कार्यक्रममा निमित्त प्रमुख प्रशासकीय अधिकृत रामचन्द्र शिवाकोटी, जिल्ला जनस्वास्थ्य अधिकृत समर्पण अधिकारी, जनस्वास्थ्य निरीक्षक बासुदेव रिमाल, स्वास्थ्य शाखा प्रमुख तिलकप्रसाद गौतमलगायतको उपस्थिति थियो। दुई दिनसम्म चल्ने उक्त समीक्षा कार्यक्रममा चालु आर्थिक वर्षका लागि नयाँ कार्ययोजना, कार्यक्रम र नीतिबारे पनि विस्तृत छलफल हुने जनाइएको छ।