बागीभुगोल साप्ताहिकको राक्सिराङ्गमा बिमोचन, गाउँको आवाज गाउँबाट उठाउने संकल्प

२६ असोज, हेटौंडा । मकवानपुरको राक्सिराङ्ग गाउँपालिकामा आइतबार ‘बागीभुगोल साप्ताहिक’ पत्रिकाको औपचारिक बिमोचन गरिएको छ । गाउँमै आयोजित कार्यक्रममा पत्रिकाले अबदेखि मनहरी, राक्सिराङ्ग र कैलाश गाउँपालिकाका २८ वटै वडाका समाचार र विषयवस्तु समेट्ने प्रतिबद्धता जनाएको छ ।

पत्रिकाको उद्देश्य ग्रामीण जीवन, स्थानीय संस्कृतिको संरक्षण र उपेक्षित समुदायको आवाज बुलन्द गर्ने रहेको छ । सहरका चिल्ला भवन र भव्य कार्यक्रमका समाचारभन्दा फरक ढंगले, चेपाङ र बनकरिया समुदायका मुद्दा, गाउँका चिउरी, गिठ्ठा, भ्याकुर र कन्दमूल जस्ता स्थानीय बिषयहरूलाई प्राथमिकता दिने बागीभुगोलले जनाएको छ ।

बिमोचन समारोहमा प्रमुख अतिथि तथा राक्सिराङ्ग गाउँपालिकाका उपाध्यक्ष बनस्तम थिङ्गले हालको पत्रकारिता उद्घाटन र कार्यक्रममै सीमित भएको भन्दै आलोचना गरे । उनले भने, “पत्रकारिता खोजमा आधारित हुनुपर्छ । उद्घाटन र चिल्ला महलका समाचार लेख्नेले गाउँका दुःख–पीडा बुझ्दैनन् । अहिले अनलाइन मिडियाले भ्रम फैलाएको अवस्थामा यस्ता भुईपत्रिकाको आवश्यकता झन् बढेको छ,” उनले बताए ।

सभाध्यक्ष एवं बागीभुगोलका संस्थापक रामकुमार एलनले राक्सिराङ्ग, मनहरी र कैलाशका विगतका संघर्ष र योगदान स्मरण गर्दै भने, “यी गाउँले नै बागमती प्रदेशको राजधानी हेटौँडालाई धानिरहेका छन् । तर, यदि गाउँ फेरि उपेक्षित रह्यो भने यसको अस्तित्व हराउनेछ । बागीभुगोलले यही आवाजलाई मुखरित गर्नेछ,” उनले जोड दिए ।

कार्यक्रममा पूर्व कैलाश गाउँपालिका अध्यक्ष टंक मोक्तान, राक्सिराङ्ग गाउँपालिकाका प्रमुख प्रशासकीय अधिकृत पदम बहादुर बस्नेत, वडा नं. ३ का अध्यक्ष उत्तम वाइवा, ग्लोबल आइएमई बैंक राक्सिराङ्ग शाखा प्रमुख रुद्र घलान, गाउँपालिकाका अधिकृत चुन नारायण श्रेष्ठ र चैनपुर प्रहरी प्रमुख दिपेन्द्र ढकाल लगायतको उपस्थिति थियो ।

सह–सम्पादक रुद्र तिमल्सिनाले कार्यक्रममा बागीभुगोल साप्ताहिकको उद्देश्य, प्रकाशन योजना र ग्रामीण पत्रकारिताको भूमिका बारे जानकारी प्रस्तुत गरेका थिए ।