ट्रक घरमा ठोक्किँएर खोल्सामा खस्दा एकको मृत्यु, चालक गम्भीर घाइते

११ चैत, हेटौँडा । मकवानपुरको बकैया गाउँपालिका–११ स्थित कान्तिलोक पथ सडकखण्डमा ट्रक दुर्घटना हुँदा एक जनाको मृत्यु भएको छ भने चालक गम्भीर घाइते भएका छन् । मंगलबार राति करिब २स्५० बजे हेटौँडाबाट काठमाडौंतर्फ जाँदै गरेको ना ८ ख ८७६० नम्बरको ‘सरफ’ लोड बोकेको ट्रक अनियन्त्रित भई सडक छेउको घरमा ठोक्किँदै करिब १००–१५० मिटर तल खोल्सामा खसेको प्रहरीले जनाएको छ।

दुर्घटनामा परी ट्रकमा सवार पर्सा, वीरगञ्ज महानगरपालिका–३२ का २० वर्षीय सन्तोष यादवको मृत्यु भएको छ। उनलाई उद्धार गरी हेटौँडा अस्पताल ल्याइएपछि बिहान ६स्५५ बजे चिकित्सकले मृत घोषणा गरेका थिए। दुर्घटनामा ट्रक चालक सोही स्थानका ३३ वर्षीय कृष्ण यादव गम्भीर घाइते भएका छन्। उनको शरीरका विभिन्न भागमा चोट लागेको छ। प्रारम्भिक उपचारपछि थप उपचारका लागि उनलाई भरतपुर, चितवन पठाइएको प्रहरीले जनाएको छ।

दुर्घटनाको खबर प्राप्त हुनासाथ अस्थायी प्रहरी पोस्ट जितपुर भन्ज्याङबाट प्रहरी सहायक हवल्दार सुरेन्द्र दराईको कमाण्डमा टोली खटिएको थियो। साथै नेपाली सेनाको लेनडाँडा सुरक्षा बेसबाट सुबेदार सिताराम कार्कीको नेतृत्वमा १० जनाको टोली घटनास्थलमा पुगेर उद्धार कार्यमा संलग्न भएको थियो ।

इलाका प्रहरी कार्यालय ठिंगनबाट ट्राफिक प्रहरीसहित थप सुरक्षा टोलीसमेत परिचालन गरिएको थियो। अनियन्त्रित ट्रकले स्थानीय ओमान सिंह तितुङको खाली घरमा ठक्कर दिएको थियो। घरमा मानिस नबस्ने भएकाले थप मानवीय क्षति हुनबाट जोगिएको प्रहरीले जनाएको छ। दुर्घटनामा घरमा भने आंशिक क्षति पुगेको छ। प्रहरीले दुर्घटनाको कारणबारे थप अनुसन्धान भइरहेको जनाएको छ।