भुटनदेवी माविमा कक्षा ११–१२ मा होटल म्यानेजमेन्ट र शिक्षा विषय थपिने

६ वैशाख, हेटौँडा । हेटौंडा उपमहानगरपालिकाको पुरानो र उत्कृष्ट नतिजा हासिल गर्दै आएको भुटनदेवी माध्यमिक विद्यालयले कक्षा ११ र १२ मा होटल म्यानेजमेन्ट र शिक्षा विषय थप गर्ने भएको छ । विद्यालयले शैक्षिक वर्ष २०८३र८४ देखि व्यवस्थापन संकायअन्तर्गत होटल म्यानेजमेन्ट र शिक्षा विषय सञ्चालनमा ल्याउने तयारी गरेको हो ।

यसअघि विज्ञान, सिभिल इन्जिनियरिङ र व्यवस्थापन विषय अध्यापन गराउँदै आएको विद्यालयले समयअनुकूल सीपमुखी र रोजगारी उन्मुख शिक्षा प्रदान गर्ने उद्देश्यसहित नयाँ विषय थप गर्न लागेको जनाएको छ । होटल म्यानेजमेन्ट अध्ययनका लागि आवश्यक सुविधा सम्पन्न ल्याबसमेत स्थापना गरिने जानकारी दिइएको छ ।

आइतबार आयोजित कक्षा १२ का विद्यार्थीको बधाई तथा विदाई कार्यक्रममा विद्यालय व्यवस्थापन समितिका अध्यक्ष तथा वडा अध्यक्ष नवीन सिग्देलले प्रविधिमैत्री, व्यवहारिक र प्रयोगात्मक शिक्षामा जोड दिँदै कक्षाहरू सञ्चालन गरिने बताए । ‘समयसापेक्ष जनशक्ति उत्पादन गर्न विद्यालयले भौतिक र शैक्षिक सुधारलाई प्राथमिकता दिएको छ,’ उनले भने, ‘गुणस्तरीय र प्रभावकारी शिक्षा प्रदान गर्न आवश्यक सबै अभ्यास गरिनेछ ।’

कार्यक्रमका सभाध्यक्ष तथा विद्यालयका प्रधानाध्यापक सूर्यप्रसाद घिमिरेले सर्वसुलभ रूपमा गुणस्तरीय शिक्षा प्रदान गर्नु विद्यालयको मुख्य लक्ष्य रहेको बताए । उनले विद्यालयलाई शैक्षिक, अतिरिक्त क्रियाकलाप तथा प्रविधिमैत्री बनाउँदै ‘स्मार्ट कक्षा’, ‘स्मार्ट विद्यालय’ र ‘स्मार्ट शिक्षा’ को अवधारणामा अघि बढाइएको जानकारी दिए ।

कार्यक्रममा कक्षा ११ र १२ संयोजक राम श्रेष्ठ, शिक्षक सरस्वती अधिकारी, विद्यार्थी प्रतिनिधि राधिका थिङलगायतले शुभकामना मन्तव्य राखेका थिए । कार्यक्रममा विद्यालय व्यवस्थापन समितिका सदस्य कृष्ण कंडेल, सहायक प्रधानाध्यापक वेदराज कोइरालालगायत शिक्षक तथा विद्यार्थीको उपस्थिति रहेको थियो ।

विदाई कार्यक्रममा कक्षा १२ का विद्यार्थीलाई कक्षागत सामूहिक फोटो मायाको चिनोका रूपमा प्रदान गरिएको थियो भने आगामी बोर्ड परीक्षाको सफलताका लागि शुभकामना दिइएको थियो । साथै, हालै सम्पन्न नगरस्तरीय परीक्षामा विद्यालयले कक्षा ८ मा चार जना विद्यार्थीलाई ४ जीपीएसहित उत्तीर्ण गराउँदै उल्लेखनीय नतिजा हासिल गरेको जनाएको छ ।