देशका केही स्थानमा वर्षा र हावाहुरीको सम्भावना

२० चेत, हेटौँडा । देशमा पश्चिमी वायु र स्थानीय वायुको आंशिक प्रभाव कायम रहेको जल तथा मौसम विज्ञान विभागले जनाएको छ। यसको प्रभावका कारण गण्डकी, कर्णाली र सुदूरपश्चिम प्रदेशका हिमाली भू–भागमा साधारणतया बादल लागेको छ भने बाँकी भू–भागमा आंशिक बदली रहेको विभागले जानकारी दिएको छ।

विभागका अनुसार शुक्रबार ९चैत २०० दिउँसो सबै प्रदेशका हिमाली भू–भागसहित गण्डकी, लुम्बिनी, कर्णाली र सुदूरपश्चिम प्रदेशका पहाडी भू–भागमा साधारणतया बादल लाग्नेछ। अन्य भू–भागमा भने आंशिक बदली रहने अनुमान गरिएको छ।

यसैगरी गण्डकी र कर्णाली प्रदेशका हिमाली भू–भागका थोरै स्थानहरूमा तथा अन्य हिमाली र पहाडी भू–भागका एक–दुई स्थानमा मेघगर्जन तथा चट्याङसहित हल्का वर्षा वा हिमपातको सम्भावना रहेको विभागले जनाएको छ। साथै सबै प्रदेशका तराई क्षेत्रका केही स्थानहरूमा हावाहुरी चल्ने सम्भावना पनि रहेको छ।

रातिको समयमा पनि गण्डकी, कर्णाली र सुदूरपश्चिम प्रदेशका पहाडी तथा हिमाली भू–भागमा साधारणतया बादल लाग्ने तथा अन्य भू–भागमा आंशिक बदली रहने विभागको अनुमान छ। कोसी, गण्डकी र कर्णाली प्रदेशका हिमाली भू–भागका एक–दुई स्थानमा मेघगर्जन र चट्याङसहित हल्का वर्षा वा हिमपात हुन सक्ने जनाइएको छ।