चितवन राष्ट्रिय निकुञ्जमा गोली लागेर गैँडाको मृत्यु

२८ चैत, हेटौँडा । चितवन राष्ट्रिय निकुञ्जभित्र गोली लागेर एक पोथी गैँडाको मृत्यु भएको छ । निकुञ्ज सुरक्षामा खटिएका सुरक्षाकर्मीमाथि आक्रमण गरेपछि प्रतिकारस्वरूप चलाइएको गोली लाग्दा करिब २४ वर्ष उमेरको पोथी गैँडाको घटनास्थलमै मृत्यु भएको निकुञ्जले जनाएको छ ।

निकुञ्जका संरक्षण अधिकृत तथा सूचना अधिकारी अविनाश थापा मगरका अनुसार शुक्रबार दिउँसो नयाँ गोरख गणअन्तर्गत नवलपुर सेक्टरको सेरी सुरक्षा पोष्टबाट पैदल गस्तीमा गएका चार जना सिपाहीमाथि गैँडाले आक्रमण गरेको थियो । घटना अमलटारी सेक्टरबाट करिब पाँच किलोमिटर टाढा निकुञ्जको कोर क्षेत्रमा भएको हो ।

अर्धवयस्क बच्चासहितको आमा गैँडासँग जम्काभेट भएपछि गैँडाले सिपाहीको टोलीमाथि आक्रमण गरेको थियो । सुरक्षाकर्मीले भाग्ने प्रयास गरे पनि गैँडाले लखेट्न नछोडेपछि सुरुवातमा १० राउन्ड हवाइ फायरिङ गरेको निकुञ्जले जनाएको छ ।

तर हवाइ फायरिङपछि पनि गैँडाले आक्रमण जारी राखेपछि गस्तीमा रहेका सिपाही विकास घर्तीलाई लडाएर लछारपछार गर्न थालेको थियो। साथीको ज्यान जोगाउन गस्तीमा रहेका सुरक्षाकर्मीले थप दुई राउन्ड गोली चलाउँदा गैँडालाई गोली लागेको र घटनास्थलमै मृत्यु भएको सूचना अधिकारी थापा मगरले बताए ।

सुरक्षाकर्मीले चलाएको गोली गैँडाको पेटभन्दा माथि करङ क्षेत्रमा लागेको थियो । निकुञ्जका प्राविधिक टोलीले मृत गैँडाको पोस्टमार्टम गरिसकेको छ । निकुञ्जका अनुसार गैँडाको खाग र खुर सुरक्षित अवस्थामा रहेको छ । घटनामा गैँडाको आक्रमणबाट सिपाही विकास घर्ती गम्भीर घाइते भएका छन् । उनको ढाड, कम्मरलगायत शरीरका विभिन्न भागमा गहिरो चोट लागेको बताइएको छ । हाल उनको काठमाडौंस्थित वीरेन्द्र अस्पताल, छाउनीको सघन उपचार कक्षमा उपचार भइरहेको छ ।