१
२ वैशाख, हेटौंडा । क्रिकेटमा भविष्य खोजिरहेका युवा खेलाडीलाई प्रेरणा दिन राष्ट्रिय क्रिकेट टोलीका खेलाडी सन्दीप लामिछाने हेटौँडा आइपुगेका छन् । हेटौँडा उपमहानगरपालिका वडा नम्बर ४ गर्दोइस्थित हेटौँडा स्पोर्ट्स एकेडेमीले सञ्चालन गरेको ग्रासरुट क्रिकेट प्रशिक्षण केन्द्रमा रहेका खेलाडीहरूसँग अनुभव साटासाट गर्न उनी बुधबार हेटौँडा पुगेका हुन् ।
उनले एकेडेमीमा करिब दुई घण्टा बिताउँदै प्रशिक्षण लिइरहेका खेलाडीहरूसँग अन्तरक्रिया गरेका थिए । नेपाली क्रिकेटका चर्चित खेलाडी लामिछानेले अन्तर्राष्ट्रियस्तरका विभिन्न फ्रेन्चाइज क्रिकेट प्रतियोगितामा सहभागिता जनाइसकेका छन् । उनले युवा खेलाडीलाई निरन्तर अभ्यास, अनुशासन र आत्मविश्वासका साथ खेल्दै अगाडि बढ्न सुझाव दिएका थिए ।
‘क्रिकेटमा भविष्य बनाउन मिहिनेत अत्यन्त आवश्यक छ । अनुशासनमा रहेर दृढ विश्वासका साथ अघि बढे सफल हुन सकिन्छ,’ उनले भने ।
एकेडेमीका सञ्चालक कोबिद बानियाँका अनुसार लामिछानेको भ्रमणले नयाँ खेलाडीलाई थप प्रेरणा मिल्ने विश्वास गरिएको छ । ‘जुनियर खेलाडीलाई हौसला दिन र उनीहरूको क्षमता विकासमा सहयोग पुर्याउन यस्तो भ्रमण निकै महत्वपूर्ण हुन्छ,’ उनले भने ।
उनका अनुसार आगामी दिनमा पनि अन्य राष्ट्रिय खेलाडीलाई एकेडेमीमा आमन्त्रण गरी युवा खेलाडीलाई प्रशिक्षण र अनुभव आदान–प्रदान गराउने योजना रहेको छ ।
‘हाल एकेडेमीमा ५० भन्दा बढी खेलाडीले नियमित प्रशिक्षण लिइरहेका छन्,’ उनले भने, ‘धेरैभन्दा धेरै जुनियर खेलाडीलाई प्रशिक्षणमार्फत राष्ट्रिय टोलीसम्म पुर्याउने हाम्रो लक्ष्य छ ।’ भ्रमणका क्रममा एकेडेमीले लामिछानेलाई सम्मान समेत गरेको थियो ।
Hetauda Live ले समाचार, विचार, मनोरन्जन, खेल, विश्व, सुचना प्रविधि, भिडियो तथा जीवनका बिभिन्न आयामका समाचार र विश्लेषणलाई समेट्छ । मर्यादित समाज विकास र उन्नतीको पथमा अगाडी बढ्ने उदेश्यका साथ आवाज बिहीनहरुको आवाज बनेर बाहिर प्रस्फुटन हुन नसकेको सत्य तथ्य, निष्पक्ष समाचार संप्रेसण गर्न सधै प्रतिबद्धछौ । भ्रस्टाचार, अनियमितता सम्बन्धी कुनै अडियो भिडियो तपाई संग छ भने हामीलाई उपलब्ध गराउनुहोस र जिम्मेवार नागरिकको दायित्व पुरा गर्नुहोला, श्रोत गोप्य राखिने छ ।
