बागमती गोल्डकपः एपिएफलाई हराउँदै चित्लाङको विजयी सुरुवात

१९ वैशाख, हेटौँडा । काठमाडौंको चित्लाङ एफसीले मकवानपुरको बागमती गाउँपालिकामा जारी आठौँ संस्करणको बागमती गोल्डकप राष्ट्रिय फुटबल प्रतियोगितामा विजयी सुरुवात गरेको छ। शनिबार बागमती– ४ स्थित सहिद स्मृति रंगशालामा भएको खेलमा चित्लाङले सशस्त्र प्रहरी बल एपिएफक्लबलाई २–१ गोलले पराजित गरेको हो ।

चित्लाङका लागि विदेशी खेलाडी सोलोमन किङले खेलको ११औँ मिनेटमा पेनाल्टीमार्फत गोल गर्दै टोलीलाई अग्रता दिलाए । पहिलो हाफमा १–० को अग्रता बनाएको चित्लाङले दोस्रो हाफमा पनि आक्रामक खेल जारी राख्यो।

एपिएफका बुद्धिमान राईले ४७औँ मिनेटमा गोल फर्काउँदै खेललाई १–१ को बराबरीमा ल्याए पनि चित्लाङका एरोन थापाले ६०औँ मिनेटमा निर्णायक गोल गर्दै टोलीलाई २–१ को जित दिलाए ।

खेलमा उत्कृष्ट प्रदर्शन गरेका चित्लाङका लक्ष्मण थापा ‘प्लेयर अफ द म्याच’ घोषित भए। उनले नगद १० हजार रुपैयाँ पुरस्कार प्राप्त गरे । जितसँगै चित्लाङ एफसी सेमिफाइनल प्रवेशका लागि एक कदम नजिक पुगेको छ। चित्लाङले अब मंगलबार मछिन्द्र क्लबसँग प्रतिस्पर्धा गर्नेछ। मछिन्द्र क्लब समूह ‘बी’बाट बाई पाउँदै अर्को चरणमा पुगेको टोली हो ।

मछिन्द्र यस प्रतियोगिताको छैटौँ संस्करणको विजेता तथा सातौँ संस्करणको उपविजेतासमेत रहिसकेको छ । प्रतियोगिताअन्तर्गत आइतबार सातौँ संस्करणको विजेता चर्च ब्वाइज युनाइटेड र सर्लाहीको बागमती युथ क्लबबिच प्रतिस्पर्धा हुनेछ। प्रतियोगिताको सेमिफाइनल खेल २३ र २४ वैशाखमा हुनेछन् भने फाइनल खेल २६ वैशाखमा तय गरिएको छ।

आयोजकसहित १० टोली सहभागी प्रतियोगिताको विजेताले १० लाख रुपैयाँ तथा उपविजेताले पाँच लाख रुपैयाँ प्राप्त गर्नेछन्। त्यस्तै, सर्वोत्कृष्ट खेलाडीले एक लाख एक हजार रुपैयाँ र विधागत उत्कृष्ट खेलाडीहरूले जनही २५ हजार रुपैयाँ पुरस्कार पाउनेछन्।