बागमतीको एकमात्र उपमाहनगरपालिका हेटौँडा बालमैत्री घोषणा

१ फागुन, हेटौँडा । बामती प्रदेशको एकमात्र उपमहानगरपालिका हेटौँडा उपमहानगरपालिका बालमैत्री स्थानीय शासनयुक्त नगर घोषणा भएको छ । बिहीबार एक भव्य कार्यक्रमकाबिच हेटौँडालाई नेपाल सरकारका उपप्रधान तथा शहरी विकास मन्त्री प्रकाशमान सिंहले बालमैत्री स्थानीय शासनयुक्त नगर घोषणा गरेका हुन् ।
‘बालबालिकामा लगानी, सुनिश्चित भविष्यको थालनी’ भन्ने मूल नाराका विभिन्न ५१ सूचक पूरा भएसँगै हेटौँडालाई बालमैत्री स्थानीय शासनयुक्त नगर घोषणा गरिएको हो । यसअघि विभिन्न समयमा हेटौँडाका १९ वटै वडालाई बालमैत्री घोषणा गरिएको थियो । यो घोषणासँगै हेटौँडा उपमहानगरपालिका निकृष्ट बालश्रममुक्त, बालविवाहमुक्त तथा बालमैत्री स्थानीय शासनयुक्त पालिका बनेको छ ।
बालमैत्री स्थानीय शासन कार्यान्वयन निर्देशिका २०७८ र बालमैत्री घोषणा कार्यान्वयन कार्यविधि २०७९ अनुसार बालमैत्री घोषणा गर्न आवश्यक ५१ सूचकहरु पुरा गरेपछि हेटौँडालाई बालमैत्री स्थानीय शासनयुक्त नगर घोषणा गरिएको घोषणा मूल समारोह समितिकी संयोजक एवं उपमहानगरपालिकाकी मेयर मिना लामाले जानकारी दिइन् ।
बालमैत्री स्थानीय शासनका ५१ सूचकहरु मध्ये उपमहानगरपालिकाले ४३ वटा सूचकमा सत् प्रतिशत र बाँकी सूचकमा आवश्यक नतिजा हाँसिल गरेको उपमहानगरपालिकाका उपमेयर राजेश बानियाँले जानकारी दिए । उनका अनुसार २६१.५८ वर्ग किलोमिटर कुल क्षेत्रफल रहेको उपमहानगरपालिकामा १८ वर्ष भन्दा कम उमेर समूहको जनसंख्या ५० हजार १९५ रहेका छ । जसमा २६ हजार १४५ बालक र २४ हजार ५० बालिका रहेका छन् । बालबालिकाको संख्यालाई आधार मान्दा ५२.८ प्रतिशत बालक र ४७.९१ प्रतिशत बालिका रहेका छन् ।
उपमेयर बानियाँले उपमहानगरपालिकामा २६५ टोल स्तरीय र १०६ वटा बाल समूह, १९ वटा वडास्तरीय र १ नगरस्तरीय सञ्जालसहित ३९१ वटा बालबालिकाका संरचना क्रियाशील रहेका छन् । ती संरचनागत समितिहरुमा ९ हजार २५० जना बालिबालिकाको प्रत्यक्ष सहभागिता रहेको उपमेयर बानियाँले जानकारी दिए ।
घोषणा कार्यक्रममा नगरभित्रका विद्यालयहरुबाट विभिन्न झाँकी र ब्यानरसहित बालबालिकहरुको सहभागीता रहेको थियो । कार्यक्रममा बालबालिकाहरुले गित, नृत्य, नाटक लगाएतका प्रस्तुति समेत प्रदर्शन गरेका थिए ।