बागमती गोल्डकपः आयोजकलाई स्तब्ध पार्दै सर्लाहीको विजयी सुरुवात

३ फागुन, हेटौँडा । आयोजक बागमती खेलकुद विकास समितिलाई स्तब्ध पार्दै सर्लाहीको बागमती युवा क्बले शनिवारबाट सुरु भएको ७ औं बागमती गोल्डकप राष्ट्रिय फुटबल प्रतियोगितामा विजयी सुरुवात गरेको छ ।

मकवानपुरको बागमती गाउँपालिकाको झुरझुरे स्थित सहिद स्मृति रंगशालामा सुरु भएको प्रतियोगितामा आयोजकलाई १–० ले स्तब्ध पार्दै सर्लाहीको बागमती युवा क्लबले विजयी सुरुवात गरेको हो । बागमतीको जितको लागि कप्तान विमल घिसिङले निर्णायक गोल गरे ।

पहिलो हाफ गोल रहित भएको खेलमा घिसिङले दोस्रो हाफको ३३ औं मिनेटमा गोल गरेका हुन् । उनले विदेशी खेलाडी सदिकको क्रस पासलाई सदुपायोग गर्दै आयोजकको गोल पोष्टको जाली चुमाउन सफल भएका थिए ।

घिसिङले डि–बक्स नजिकैबाट गरेको पावरफुल प्रहार बागमती खेलकुद विकास समितिका गोलरक्षक बिशाल सुनारले रोक्न सकेनन् । गोलकर्ता घिसिङ नै खेलको म्यान अफ द म्याच भए । उनले नगद १० हजार रुपैंयासहित शिल्ड प्राप्त गरेका छन् ।

‘ए’ डिभिजनका ७ र मोफसलका ३ टिमको सहभागिता रहेको प्रतियोगिता आगामी फागुन १२ गतेसम्म संचालन हुने छ । प्रतियोगिताको उपाधि विजेताले १० लाख र उपविजेताले पाँच लाख रुपैयाँ पुरस्कार पाउँने छन् । प्रतियोगिताको सर्वोत्कृट खेलाडीलाई १ लाख एक हजार तथा विधागत उत्कृष्ट खेलाडीहरुलाई जनही २५ हजार प्रदान गरिने आयोजकले जानकारी दिएको छ ।

बागमती खेलकुद विकास समितिका अध्यक्ष रहर सिंह थिङको अध्यक्षतामा भएको प्रतियोगिताको उद्घाटन माओवादी केन्द्रका अध्यक्ष एवं पुर्वप्रधानमन्त्री पुष्पकमल दाहाल ‘प्रचण्ड’ले गरेका हुन् ।