आजबाट अनुपम स्मृति फुटबल: उद्घाटन खेलमा ७ र १८ नम्बर वडा खेल्ने 

७ फागुन, हेटौंडा । आज बुधबारबाट हेटौंडामा पहिलो संस्करणको अनुपम स्मृति १६ वर्ष मुनिको फुटबल प्रतियोगिता हुँदैछ । प्रतियोगिताको उद्घाटन खेलमा ७ र १८ नम्बर वडा खेल्ने छन् ।

नगर खेलकुद विकास समिति हेटौंडाको आयोजना तथा हेटौंडा उपमहानगरपालिकाको आर्थिक सहयोगमा हुन लागेको प्रतियोगितामा उपमहानगरका १९ मध्ये १० वडाले सहभागिता जनाउदैन् ।

हेटौंडाको ६, ७, ८, ९, ११, १२, १३, १५, १८ र १९ नम्बर वडाले मात्रै खेलमा सहभागिता जनाउने भएका हुन् । आयोजकले प्रतियोगिताको अघिल्लो दिन मंगलबार खेल तालिका सार्वजनिक गरेको हो । प्रतियोगिताको फाइनल खेल १० गते हुनेछ ।

हेटौंडा–१२ निवासी अनुपम घलानको गत असोजमा एन्फा एकेडेमी सिस्नेरीको पहिरोमा परेर निधन भएको थियो । उनकै स्मृतिमा हेटौंडामा प्रत्येक वर्ष आयोजना गर्ने गरी प्रतियोगिता सुरु गर्न लागिएको हो ।

हेटौंडा–५ स्थित पिप्ले–क्याम्पा रंगशालामा हुने प्रतियोगिताको विजेता टिमले एक लाख रुपैयाँसहित ट्रफी, मेडल तथा प्रमाणपत्र प्राप्त गर्नेछ भने उपविजेता टिमले ७० हजार रुपैयाँसहित ट्रफी, मेडल तथा प्रमाणपत्र प्राप्त गर्नेछ ।

यस्तै विधागत उत्कृष्ट खेलाडीले जनही ५ हजार रुपैयाँ नगद सहित ट्रफी प्राप्त गर्नेछन ।

प्रतियोगिताका लागि हेटौंडा उपमहानगरपालिकाले ७ लाख रुपैयाँ बजेट विनियोजन गरेको छ । प्रतियोगिताको सम्पूर्ण तयारी पूरा भएको आयोजक नगर खेलकुद विकास समितिका अध्यक्ष रविन्द्रप्रसाद घिमिरेले जानकारी दिए ।