साबिक विजेता मच्छिन्द्र बागमती गोल्डकपको सेमिफाइनलमा

८ फागुन, हेटौँडा । साबिक विजेता मच्छिन्द्र क्लब सातौँ संस्करणको बागमती गोल्डकप राष्ट्रिय फुटबल प्रतियोगिताको सेमिफाइनलमा प्रवेश गरेको छ । बिहीबार बागमती–४ स्थित सहिद स्मृति रंगशालामा भएको अन्तिम क्वार्टरफाइनलमा सर्लाहीको बागमती युवा क्लबलाई १–० गोलले हराउँदै मच्छिन्द्र सेमिफाइनलमा प्रवेश गरेको हो ।

मच्छिन्द्रको जितमा खेलको ४३औँ मिनेटमा रेजिन सुब्बाले पेनाल्टीमार्फत गोल गरेका हुन् । बागमतीका खेलाडी हेमन्त भुजेलले गोललाइनमा हातले बल रोकेपछि रेफ्रीले पेनाल्टी दिएका थिए ।

खेलको म्यान अफ द म्याच मच्छिन्द्रकै शिशिर लेखी भए । उनले १० हजार रुपैयाँ प्राप्त गरेका छन् । प्रतियोगितामा आयोजकलाई हराउँदै बागमती युवा क्वार्टरफाइनलमा प्रवेश गरेको थियो भने मच्छिन्द्रले बाई पाएर सीधै क्वार्टरफाइनलमा स्थान पाएको थियो ।

मच्छिन्द्र गत संस्करणको विजेता टोली हो। गत संस्करणमा एपिएफलाई हराउँदै मच्छिन्द्रले उपाधि जितेको थियो । प्रतियोगिताको फाइनल खेल फागुन १२ गते हुनेछ।

प्रतियोगिताको उपाधि विजेता टोलीले नगद १० लाख र उपविजेताले ५ लाख रुपैयाँ प्राप्त गर्नेछन् । यस्तै, प्रतियोगिताको सर्वोत्कृट खेलाडीलाई १ लाख १ हजार तथा विधागत उत्कृष्ट खेलाडीलाई जनही २५ हजार, प्रत्येक खेलका म्यान अफ द म्याचलाई १० हजार रुपैयाँसहित सिल्ड प्रदान गरिने आयोजकले जनाएको छ।