साविक विजेता मछिन्द्र बागमती गोल्डकपको फाइनलमा

१० फागुन, हेटौँडा । साविक विजेता मच्छिन्द्र क्लब ७ औं संस्करणको बागमती गोल्डकपको फाइनलमा प्रवेश गरेको छ । मच्छिन्द्रले उपाधिका लागि सोमबार हुने फाइनल खेलमा चर्च ब्वाइजसँग प्रतिस्पर्धा गर्ने छ ।

बागमती गाउँपालि ४ स्थित सहिद स्मृति रंगशालामा शनिवार भएको दोस्रो क्वाटरफाइनल खेलमा मच्छिन्द्रले चौथो संस्करणको विजेता टोली थ्री स्टार क्लबलाई ३–१ गोलले निराश बनाउँदै चर्च ब्वाइजसँगको उपाधि भिडन्त पक्का गरेको हो । मछिन्द्रको जीतका लागि शिशिर लेखि, समिराज थोकर, र विदेशी खेलाडी स्टेफेनले एक÷एक गोल गरे ।

थ्री स्टारका विदेशी खेलाडी एलेक्स विलियम्सले एक गोल गरे । खेलमा सुरुवाती अग्रता भने थ्री स्टारले बनाएको थियो । खेलको पहिलो हाफको ३७ औं मिनेटमा विदेशी खेलाडी एलेक्सको गोलबाट थ्री स्टारले अग्रता बनाएको थियो । तर सम्हालिएर खेल्न नसक्दा थ्री स्टारले दोस्रो पटक उपाधिका लागि उपाधि भिडन्त गर्ने अवसर गुमाएको छ ।

१ गोलले पछि परेको मच्छिन्द्रका खेलाडीहरुले संयमित भएर खेल प्रदर्शन गर्दा खेलको पहिलो हाफको ४२ औं मिनेटमा थ्री स्टारसँग बराबरी गर्न सफल भए । उसका लागि पहिलो गोल शिशिर लेखिले गरेका थिए । यस्तै खेलको ५१ औं मिनेटमा समिराज थोकर र ८२ औं मिनेटमा विदेशी खेलाडी स्टेफेनले गोल गर्दै टिमलाई जीत दिलाए ।

खेलको म्यान अफ द म्याच मच्छिन्द्रका देवेन्द्र तामाङ घोषित भए । उनले नगद १० हजार रुपैयाँसहित शिल्ड प्राप्त गरे । अब विजेता टोलि मच्छिन्द्रले उपाधीका लागि सोमबार चर्च ब्र्वाइज युनाइटेडसँग प्रतिस्पर्धा गर्नेछ । यसअघि शुक्रबार भएको पहिलो सेमिफाइनल खेलमा विभागीय टोलि एपीएफलाई ३–२ गोलले हराउँदै चर्च ब्वाइज प्रतियोगिताको फाइनलमा प्रवेश गरिसकेको छ । चर्च ब्वाइज पहिलो सहभागितामै प्रतियोगिताको फाइनलमा पुगेको हो ।

सोमबार हुने फाइनल खेलको विजेताले १० लाख र उपविजेताले ५ लाख प्राप्त गर्नेछन् । यस्तै प्रतियोगिताको सर्वोत्कृट खेलाडीलाई १ लाख १ हजार तथा विधागत उत्कृष्ट खेलाडीलाई जनही २५–२५ हजार रुपैयाँ प्रदान गरिने आयोजकले जनाएको छ ।